Japan Open-a inhnukdawk Osaka

Japan Open-a inhnukdawk Osaka
Tennis-ah inhliam an pun belh zel a, second round khelh laia a ke a tihnat kha khelkmual a luhpui zui zel theih tak loh avangin
Naomi Osaka chu nimin Japan Open quarter-final khelh hmain a inhnukdawk.
2021 Australian Open title a lak hnua Grand Slam trophy hawn leh ngai ta lo Japanese world number one hlui hian Nilaini khan painkiller hmang nawk nawk chungin three-set last-16 match-ah defending champion Suzan Lamens paltlang leh hram mah se quarter-final khel turin a inpeihchhuak zo ta ngang lo a ni.
Top seed Osaka hian Lamens a hmachhawn tum pawh khan a malpui veilam chu a tuam char bur tawh a, last eight lama Jaqueline Cristian hmachhawn tur a nih laiin Romanian chuan inkhel hah loin semi-final a lut ta a ni.
Japan Open huaihawttute chuan X kaltlangin second round-a Naomi Osaka inhliam kha quarter-final khelhpui tura a dam hman loh thu leh a inhnuhdawh a ngai ta pawi an tih thu an tarlang.
Heti a nih takah chuan Osaka hian tunthla tawp lama Tokyo khawpuia Pan Pacific Open a khelh theih dawn leh dawn loh a chiang ta lo.
Tunlai hian tennis player hraw engemawzat hliam vangin an talbuai mek a, four-time Grand Slam champion Osaka hi chuti ang player kan hmuh hnuhnungber ni rihin, Ningani khan a hriselnain duhthu a sam loh avangin British number one Emma Raducanu pawhin a season tawp thu a puang lo puang tawh a ni.
Briton hma hian Australian star Daria Kasatkina, Ukraine player Elina Svitolina leh Spain nula Paula Badosa-te pawhin tun season-a inelna an hmachhawn tawh loh tur thu an lo puang tawh bawk.
Chawlhkar liamta khan China rama tournament pahnihah hliam leh damlohna avangin player panga ngawt inkhel chhunzawm thei loin an inhnukdawk a; September thla khan China Open khelh laia player an inhliam nual avangin Iga Swiatek chuan tennis season rei leh tournament khelh tur tam lutuk chu a lo sawisel tawh a ni.