JCM-in FCAA pawm tawh Special Assembly-a ngaihtuah that an ngen

Mizoram thatna duhtu pawl hrang hrang intelkhawmna Joint Civil Society of Mizoram chuan State Legislative Assembly-in Forest Conservation Amendment Act (FCAA) 2023 a pawm (adopt) tawh chu Special Assembly koa hnukkir turin a ngen.
Joint Civil Society of Mizoram (JCM) thuchhuak chuan, FCAA 2023 hi hmasawnna atan a pawimawhna awm mah se, Mizoram leh a chhunga cheng zawng zawng tan a him lo hle in an hria a, pawmna resolution Mizoram Assembly-in a pass tawh hi hnukkir turin Special Assembly ko turin ram hruaitute leh sawrkar an ngen tih a sawi.
‘He resolution pawm tak hi hmanhmawh taka pass, MLA tam ber pawhin an zirchian hman loh leh mipui leh NGO phei chuan an ngaihdan an sawi ve hman loha pass a ni hi a pawi kan ti a. Hei vang pawh hian sawihona tha zawk neih a nih theihna turin Special Assembly hi koh a tulin kan hria,’ a ti.
FCAA 2023 hi Mizoram state tan leh Autonomous District Council tan a him lo tih JCM hian sawiin, international border (ramri) atanga km.100 (Mizoram pum) ah sawrkar laipuiin ram tana pawimawh a tihah hma a la thei dawn a, hetah hian forest clearance pawh a ngai lo, tih a sawi.
‘He dan hmang hian Mizoramah leilung hausakna zawn leh laih chhuah awlsam takin sawrkar laipuiin a duh danin a ti thei tawh dawn a. Tunah hian Mizoramah rare earth minerals zawn tum mek a ni,’ a ti.
Sawrkar kher lo, company /MNC/ corporate pawhin hetiang thil hi an rawn tih theih dawn avang leh sawrkar laipuiin a duh apiang a ti thei dawn tih a inziah avangin a him lo an tih thu a sawi a ni.