Zirtirtuten Zirtirtute Ni an hmang ve dawn lo

Zirtirtuten Zirtirtute Ni an hmang ve dawn lo
Samagra Shiksha hnuaia thawk zirtirtute chuan thla hnih hlawh an lak tawh loh chu sawrkarin kumin Zirtirtute Ni hman hmaa pe tura an ngenna a hlawhtlin tak loh avangin, Mizoram sawrkarin kumin September 4-a Zirtirtute Ni hman tura tih chu an hmang ve dawn lo tih an sawi.
Federation of Mizoram Samagra Shiksha Employee (FEMSE) thuchhuak chuan, Teacher’s Day thlen hma ngeia thla hnih – July & August hlawh pe tura sawrkara an thlen chuan awmzia a neih loh avangin FEMSE Council Meeting-a rel tawh angin, hreh tak chungin sawrkarin September 4-a Zirtirtute Ni hman tura a tih chu an hmang ve thei dawn ta lo tih a sawi.
‘Samagra Shiksha hnuaia thawkte hi kan hlawh a beithamin, regular takin kan la thei lo fo thin a. Hetiang hi kan nih avangin regular taka hlawh min pe turin sawrkar hi kan phut a. Hlawh kan lak mumal loh fo chhanah hian, a mawhphurtu min chhuichhuah sak a, a tul anga hma min laksak turin thuneitute kan phut a ni,’ a ti.
Zirtirtute Ni an hman ve theih loh chungchangah an thawhpui zirtirtu dang, zirlaite, zirlai nu leh pa leh mipuiin an dinhmun hrethiam a, hriatpui turin an ngen tih FEMSE chuan a sawi a ni.