Jeddah tlankawnga chak ber Perez

Jeddah tlankawnga chak ber Perez
Pathianni Saudi Arabian Grand Prix-ah Oracle Red Bull Racing ‘one-two’ lai kan thlirliam leh ta a; tuntum chu Mexican driver Sergio Perez-a’n a team-mate Max Verstappen hma-khalhin lawmman semna dawhsan chung ber a luah a; wold champion Verstappen hi pahnihnaah thlengin, season thara thawm neilian nghal Aston Martin Spanish driver Fer-nando Alonso chu pathumna a ni.
Saudi Arabian track-a pole posi-tion atanga tlanchhuak Perez-a hnehna sualchhuah kha a career-a grand prix vawinga a chak tlinna chiah niin, championship standing-ah intlansiak hmasa zawka hnehtu Dutchman Verstappen chu point khatin a pha lo a, pahnihnaah awmin, 15-na atanga tlanchhuak Verstappen hian pahnihna a luah phak piahlamah fastest lap ken tel bonus point khat a hlawhchhuak tel a, chumi hmang chuan a team-mate lakah a hma-hruaina a humhim thei hram.
Double Formula One world champion Verstappen hian Jeddah khawpuia floodlit Corniche street circuit-ah ropui takin car a khalh leh a, a team-mate nen podium luahin, tun season-a intlansiak vawihnih zawh tawhah Red Bull ‘one-two’ ve ve hmuh tur a awm a; March ni 5 season bultannaah pawh khan Bahrain-ah Oracle Red Bull Racing driver pahnih hian podium sang ber leh a dawttu an lo luah tawh a; Constructor Standing lamah Oracle Red Bull Racing chuan race vawihniha point 87 rut chungin hma an hruai fal hle der tawh.
Verstappen hian grid-ah 15-na atanga tlanchhuakin, safety car vanga tlankawng khar a nih hmain palina dinhmun a fight chho hman a, hnehna chang turin rin a kai leh hman hial a; Mercedes driver George Russell leh Aston Martin khalhtu Fernando Alonso lehpel thei mah se Perez erawh a hmakhalh zo ta ngang bik lo a, pahnihna a lungawipui mai a ngai.
Tarlan tak angin, season thara intlansiak vawihnihah Red Bull an chungnung a, one-two an hlenchhuah ve ve theih avangin kuminah pawh team dang tan beiseiawm lo leh tura ngaih a ni nghal thuak der tawh!
Safety car chhuah hnuah palina ni ta Russell nen inthlur deuh mah se Lewis Hamilton chuan a Mercedes team-mate hmakhalh zo loin panganaah a thleng a; a hnungah Ferrari driver pahnih Carlos Sainz leh Charles Leclerc-te’n an dawt.
Kum 40 mi ni tawh Alonso tan tun kha a career-a podium vawi 100 a lawn tlinna chiah niin, podium celebration avanga 10-second penalty a hmuh kha a tuar a tih ve theih bawk awm e.