JICA kaltlanga Mizoram leh Japan thawh dun dan tur rel
JICA kaltlanga Mizoram leh Japan thawh dun dan tur rel
Minister Lalnghinglova Hmar leh Japan International Cooperation Agency (JICA) India hotute chu Ningani khan New Delhi-a JICA office-ah an inkawm a. Mizoram hmasawnna atana thawhho dan tur an sawiho zingah, kumin December-a sports workshop buatsaih, Mizoram coach-te kaihruai tura Japanese coach chah luh, Japanese mipui nawlpuiin Mizoram leh India hmarchhak an hriatchian zawkna atana intlawhtawn an rel.
Sports minister Lalnghinglova Hmar chuan Mizoramin Olympic 2036 hmathlir a nei tih sawiin, sports discipline parukah Mizo coach-te zirtira kaihruaitu tur ‘Japan Overseas Cooperation Volunteer’ (JOCV) hnena dilna an thehluh chungchang a sawi a. Hei hi sawrkar laipuiin a pawmpui tawh a, Japanese coach an lokal theihnan chak zawka hma lakpui turin JICA hotute hi a sawm a ni.
LESDE minister ni bawk Lalnghinglova Hmar hian Mizoram leh Japan chu thawk dun tur tak an ni, tiin, Japan-in a mamawh tak nurse leh upa enkawltu (caregiver) chu Mizo thalaite thiam zawng tak a ni tih a sawi a. Sum leh pai piahlamah thiamna leh hriatna inthleng tawn a, intihchak tawn chu thawhhona tur pawimawh tak a ni tih a sawi.
Mizoram sawrkar leh JICA thawhho dan tur sawiho nghal a ni a. A bul tanna atan kumin December thla laihawlah Tokyo-a ‘Nippon Sports Science University’ nen tangdunin Aizawlah ‘Coach Development Workshop’ buatsaih an rel a. Workshop-ah hian Nippon Sports Science University-a mithiamten zirtirna an pe ang. A thawh khatnaah hian sports kaihhnawih bik thlurbing phawt niin, kum dangah chuan skill development leh topic dangah pawh workshop hi buatsaih zel tum a ni.
Mizoramin sports discipline 6 – Track & Field, Wrestling, Judo, Weightlifting, Table Tennis leh Archery a JOCV volunteer-a dilna chu tihhlawhtlin an tum tur thu JICA India hotute hian an sawi a. An harsatna tawh pakhat, Mizoram lut tura ‘Protected Area Permit’ ngai chungchanga zawhna awm chu Home department hotute nen sawiho nise, an ti.
Japan leh Mizoram /hmarchhak state inzawmna tha zawk a awm a theihna tura Japan-a Mizoram aiawhte zin tura JICA-in an sawmna LESDE department-in tunhnaia a dawn chungchang pawh sawiho a ni a; Japan-a hmasawnna hnathawh leh hnathawk tura indawr tawn zel dan an zir dawn a ni.