Jimin-a’n Hot 100-a a No.1 avangin lawmthu sawi

Jimin-a’n Hot 100-a a No.1 avangin lawmthu sawi
South Korean artist zinga solo artist anga Billboard Hot 100 chart-ah No.1 kai thei hmasa ber Jimin chuan Indtagram-ah a fan-te pualin Hot 100 chart top 10 screenshot a post a, lawmthu sawiin, “Ka hmangaih vek che u,” tiin a caption-ah a dah a, purple heart emoji a dah tel bawk.
Jimin hian a debut solo album ‘FACE’ chu March ni 24 khan a tlangzarh a, he album hi hla paruk awmna niin, he album-a a hla dang ‘Set Me Free, Pt. 2’ chu a a lo tichhuak tawh bawk. Production lamah pawh Pogg, Ghstloop, Supreme Boi, BLVSH leh Evan te a thawhpui a, hlaphuah (songwriting)-ah BTS-aa bandmate RM nen hla pathumah an thawk dun a, tuna a hla No.1 kai ta ‘Like Crazy’ phuahtu zingah hian an pahnihin an tel nghe nghe a ni.
Jimin telna BTS group hian Hot 100 chart record siamin, South Korean hlang member awmna group zingah Hot 100 chart-a No.1 ni thei hmasa ber an ni a, 2020 khan an hla hit ‘Dynamite’ hmangin he chart-ah hian No.1 an kai a, group angin midang an thawhpuina te nen chuan chart No.1 kai thei hla paruk an nei tawh bawk a ni.
BTS member te hian group chawlhsanin, solo project lamah an kal rih a, an member zingah J-Hope, RM leh Jin ten solo single an tichhuak theuh tawh bawk a ni. Tunah hian an member Jin chu thla 18 chhung sipai-a tang turin South Korean sipai-ah nikum December khan a lut a, member dangte pawh sipaia la tang vek tur an ni a, group angin engtikah nge an tihkhawm leh dawn tih hi a sawi chian theih tawh rih lo a ni.