LMC chairman leh dy chairman inruat

LMC chairman leh dy chairman inruat

	Zoram People's Movement party chuan Lunglei Municipal Council inthlana tling thar councillor turte atangin chairman leh deputy chairman an ruat a. Executive councillor erawh state sawrkarah awm thei zat bituk sa aia tam an dil belh avangin ruatfel an la ni lo.

	ZPM party hruaitute chuan Thawhlehni khan Lunglei Municipal Council inthlan neih zawh taka ZPM councillor thlantlin takte hi thutkhawm puiin, LMC Ward No.III atanga thlantlin Lalzuithanga chu lungrual takin chairman ni turin an ruat a, Ward No.VII atanga thlantlin K Lalrinawma chu deputy chairman tura ruat a ni.

	ZPM working president K Sapdanga sawi danin, executive councillor post a tam thei ber pe turin state sawrkarah an dil a, tunah hian an nghak mek. "Danah chuan pathum aia tam tur a ni lo tih a ni a, engzat nge min pek dawn kan la hre loa, executive councillor hi lo ruatlawk theih ngawt a ni lo," a ti.

	Hetihlai hian Lunglei Municipal Council chief executive officer Lalhmingthanga sawi danin, LMC councillor thlantlin te hi sawrkar gazzette-ah hriattirna chhuah phawt tur a ni a, hriattirna chhuah atanga ni 30 chhungin Board of Councillors (BoC) inkhawm buatsaih tur a ni. BoC inkhawmah hian Lunglei bawrhsap kaihhruaina-in thu an tiam anga, chutah chuan chairman leh deputy chairman te thlan tur a ni.

	State sawrkarah Board of Councillors inkhawm koh tur hi ngenna an thlen nghal tih a  sawi a, inkhawm tur chuan  ni 7 chhung tal inhrilhlawk a ngai tih sawiin, April chawlhkar thumna vel an tinzawn tih a sawi. Chutih rualin a ni leh a hun chu state sawrkar thu thu a ni thung tih CEO hian a sawi a ni.

Councillor thar turte nen an inkawmnaah ZPM Gen. Hqrs. president Lalliansawta chuan an party-in record thar danglam tak, opposition awm miah lohna LMC sawrkar a siam thei chu a ropui hle, tiin, hetiang thil hi Mizoram mai ni lo khawvel huap pawha thil thleng zen zen ngai lo a ni tih a sawi.

	"Opposition hi rorelna khalhngil tura dinhmun pawimawh tak chelhtu ni mah se, opposition tel loa ngil taka in kal theih ka ring. Lunglei mipuiin in chungah rinna nghatin duh takin an thlangtling che u tih hrereng ula, mipui duhdan ang taka hnathawh kawr ha tur leh, rilru sáng tak pu chunga Lunglei khawpui enkawl turin kan beisei che u a ni," a ti.

	Huaisen tawk lohna chu hnathawh tiharsatu a ni fo thin, tia sawiin a tul huna huaisen ngam turin a chah a. Hmelhriat leh chhungkhat an nih avanga tih ngam loh bik neih chuan hmingthatna tur a khuhbo fo thin, tiin, hleih nei loa dik leh fel taka rorel thiam turin a chah bawk.

	"In beisei anga state sawrkar atanga hnathawhna tur sum a rawn kal tam lo a nih pawhin, in thawh chin chinah hna tha leh belhchian dawl a ni tur a ni. Kan chunga Lalpa a lawm chuan chu ramah chuan min hruai anga, min pe ang,' Lalliansawta hian a ti.