Jimin-a’n ‘Set Me Free Pt.2’ chungchang a sawi

Jimin-a’n ‘Set Me Free Pt.2’ chungchang a sawi
Kawvela pop group hlawhtling berte zingah telin, chuta tanga mahnia han tla fal tura ke han pen chu zâm ruk ve deuh te pawh a awl khawp ang, a kawngzawh tharah chuan a fan-ten eng angin nge an dawnsawn dawn tih te a hriat lawk bik tlat si loh a. Mahse, BTS member Jimin tan chuan rilru tihahna tur a awm lo ve, a solo single ‘Set Me Free Pt. 2’ a tlangzarh chiah a, fans lamin an lawm nghal tlat. Solo artist anga a kal zelna turah kawng a inhawng zau tlat.
Consequence of Sound-in an kawmnaah JImin chuan, “He hla a pian lai khan, inzawmna kan nei tlat a. US-ah pawh choir recording ka zuk chhim ve ngat a, an kianga awma lo ngaihthlak ve chu min hneh dan a danglam. Hriatreng tur thil tha tak a ni,” a ti.
He hlaah hian zaipawlten a pui kha a ni a, hip-hop beat leh Auto-Tuned vocals niin, Jimin-a solo album ‘FACE’-ah a tel dawn a, e album hi March ni 24-a tlangzarh tur a ni. A hlaah hian ‘Pt.2’ tih a awm nain, ARMY-te chuan a ‘Pt.1’ a awm chuang lo tih an hre vek ang, Jimin hian ‘Set Me Free’ hla dang a la nei lo hrim hrim. Mahse, he hla hi ‘Pt.2’ a tihna chhan chu a bandmate Suga 2020 D-2 mixtape zawmna ang deuha a kaltir avangin ‘Pt.2’ a ti ta mai a ni.
Jimin chuan, “A hla hian inzawmna a nei lo, part one leh part two anga then pawh kan tum chuang lo. Mahse, ka hla hian zalenna leh hmalam pan chungchang a tarlang a, SUGA hla hian chumi hmalama thil awm thenkhat a tarlang ve thung a, chuvangin, a chhunzawmna anga dah kha thain ka hria a ni,” a ti.
He hla hi ama chungchang a nih thu Jimin chuan a sawi a, a hlaah hian tumruhna leh hnehna te chu a thu laimu a ni a, midang tana a tih ni lovin, amah a insawina a ni a, “Midang zalenna tur lam ni lovin, keimah zawk hi chhuah zalen ngai ka ni. A tawpah chuan keimah kan inchhuah zalen thei ta a ni,” a ti bawk.
BTS member ten group anga chawlh lain, solo project hrang hrang an kalpui chu a tirah chuan member dangte pawh an zam ru ve tho niin Jimin chuan a sawi a, an album leh single an tihchhuah dawnah an zam ru vek a, mahse, vanneihthlak takin result tha lam an nei vek chu lawmawm a tih thu a sawi a, amah ngei pawh a zam tih sawiin, “Member dangte zahna thlentu nih ka duh lo a, inchhuang taka BTS member nih theih ka duh a ni,” a ti.
A album thar tur ‘FACE’ chungchang sawiin, Jimin chuan he album hi a hun kaltawh a thlir kir theih dan leh, “chumi ka hneh a, ka paltlang dan te hi…miin ka thinlung a khawih dan puanchhuah ka tum hi an hriatthiam chuan, album hlawhtlinna niin ka ngai ang,” a ti.