J&K-a apple ching leh sumdawngten kawng chhia tuar mek
J&K-a apple ching leh sumdawngten kawng chhia tuar mek
Jammu & Kashmir-a apple chingtute chuan state pawna an thawn chhuahna kawngpui ber, Jammu-Srinagar national highway thla khat dawn a pin tawh avangin an tuar hle a. An thil thawnte tlai taka thlengin a chhe nasa hle tih an sawi.
Km 270-a thui kawngpui hi Kashmir atanga kumtluana India hmun dang tlawhpawh theihna awm chhun a ni a, tunah hian August 26–27 inkara ruah sur nasa avang khan Nashri leh Udhampur inkarah a ping mek.
Kar hmasa atang khan kawng hi tlem tihtlang ni tawh mah se apple phur truck za tel kawngah hian an tang a, hei vang hian theite hi a tawih chhe nasa hle.
“Tun hi apple thar vanglai a ni a, September 1-a Kashmir chhuahsan truck-te chuan September 16-ah an tum ram an thleng thei chauh a ni,” tiin Jammu-a Narwal Mandi-a sumdawng, Sandeep Mahajan-a chuan PTI a hrilh a. An apple 60% dawn chu a chhia a nih thu leh loh theih lohva a man tlawma hralh a ngaih thu a sawi.
Sumdawng dang, Randeer Gupta-a pawhin an sum hmanna chu a thlawnin a kal ral vek tih PTI a hrilh a. “Rs. 1,000 man box-te chu Rs. 100–200 vela hralh a ngai a. Truck-in ni 10 chuang Jammu thlen nan a ngai a. Kan sum sen 5% pawh kan hmu let thei dawn em tih a hriat loh,” a ti.
Kum 50 vel sumdawng tawh, Manik Gupta pawhin tuna an thil tawn zet chu ‘chhiatna nasa’ a tling tih a sawi a. A chingtuten an paih a ngai a, 60% dawn a chhe tawh tih a sawi.
Sumdawng thenkhat hian a man an pe lawk a, thenkhat phei chuan sum pukin an pe lawk hlawm a. Tunah hian Kashmir-a a dah thatna hmunte chu a khat vek si a, tihngaihna a awm lo tih ans awi.
“Apple thar leh hralh hun lai hi thla thum chauh a ni a. Jammu & Kashmir eibar innghahna pakhat, kan thlai tharte hralhna tur phurh leh kalpuina hi kan ngaih pawimawh a ngai a ni,” tiin Manik Gupta chuan a sawi.
Lo neitu, sumdawng leh a buaipuitu dangte chuan sorkar pawh rang taka che chhuaka an ram biala an eibar zawnna pui ber tlu chhe tur chu chhanchhuak turin an ngen.
Divisional Commissioner, Kashmir chuan kawng a pun avanga hlohte chhut chhuaktur tur committee a din tawh a ni.
Union territory hian ram chhunga apple thar chhuah 70% vel tumin a thawn chhuaktu tam ber pawh an ni a. Kashmir phaizawla cheng chhungkaw nuai 35 velin he sumdawnna hi an buaipui a. Kum 2023-24 khan tonne nuai 20.40 vel an thar a ni.