J&K-a nikuma firfiak that 60% kha Pakistani – Army Chief
J&K-a nikuma firfiak that 60% kha Pakistani – Army Chief
Kum liam ta chhunga Jammu & Kashmir-a mi firfiak that zinga 60% chu Pakistani lam chhuak vek an ni tih Army Chief Gen Upendra Dwivedi chuan Thawhtannia Line of Control (LoC) boruak chungchanga thuthar lakhawmtute a kawmnaah a sawi.
Gen Dwivedi hian tuna Jammu & Kashmir-a firfiak la awm zinga 80% chuang pawh Pakistani tho an ni tih a sawi.
“Jammu & Kashmir boruak hi thunun vek a ni a. Line of Control-ah hian February, 2021 atang khan inkahhai puan a ni a, heti chung hian mi firfiakte erawh chetla an awm reng a ni,” tiin Gen Dwivedi chuan a sawi a. Ani hi Pakistan leh China nena India a inrina lai bawra tawnhriat lo nei teuh tawh a ni.
Gen Dwivedi chuan lehlam atanga India-a luh ruk tum pawh an la awm reng tih a sawi a, drone hmanga indona hmanrua leh ruihhlo tawlh luh tum pawh an la awm niin a sawi bawk.
Tun hnaiah Kashmir hmar lam leh Doda-Kishtwar velah mi firfiak chet vel a tam deuh tih a sawi a; mahse, a pum puia thlirin tharum thawhna thleng thin chu ‘thunun’ a ni tih a sawi.
“Tunah hian Amarnath Yatra-ah biakzin nuai nga chuang kan nei a, Lok Sabha leh assembly inthlan pawh muanawm takin kan nei a, hei hian thil chu a tha zawngin a inthlak mek tih a tilang a. ‘Terrorism to tourism’ tih thupui kan neih pawhin zawi zawiin a hmelhmang a lantir tan mek a ni,” tiin nikum June thlaa Chief of the Army Staff ni tan, Gen Dwivedi chuan a sawi.
Gen Dwivedi hian Ladakh khawchhak lama inepna hmun hnih atanga Indian leh Chinese sipaite an insaseng hnuah Line of Actual Control (LAC) pawh a muanawm a, vil erawh a la ngai reng niin a sawi.
“Patrolling pawh tih dan pangngaiin Ladakh chhak lama Depsang leh Demchok-ah kalpui zel a ni,” a ti.
Sipaite hian ramri tihchangtlun leh hmasawnna thlenna turin thil an ti a, chu chu an tum ber pakhat a ni tih a sawi bawk.
India leh China hi Ladakh-a Galwan-a an intihbuai hnuah kum li chhung zet ramria an inep hnuah tun hnaiah inremna siamin sipai an chhawp hnaih ve ve pawh an saseng ve ve a ni.