Lok Sabha-a President’s Address Motion of Thanks sawihonaah inhnialna a nasa hle a. A hmain BJP te chuan Congress MP Rahul Gandhi chu finfiahna awm lo leh hming tihmelhem thei zawnga PM Modi chungchang sawi tiin an sawisel na hle.
Parliamentary Affairs Minister Pralhad Joshi chuan Speaker chu Rahul-an PM Modi chungchang a sawi chu thaibo sak turin a ngen a, Speaker chuan a ngaihtuah tur thuin a chhang a ni.
-- Advertisement --
Opposition te chuan Adani-Hindenburg chungchang chu joint parliamentary probe neih an ngiat a. Congress leader Mallikarjun Kharge chuan prime minister-in engmah hlauh a nei lo a nih chuan eng vangin nge parliamentary probe a hlauh si tiin a sawi a.
Kharge chuan Prime Minister Narendra Modi a BBC documentary leh Shah Rukh Khan movie ‘pathaan’ khap chu entirnana hmangin, “Thil in khap a nih chuan, mipui tam zawkin an en zel ang,” tiin a sawi bawk.
AIMIM MPAsaduddin Owaisi pawhin Motion of Thanks sawinaah Modi sorkar chu selin, Hindenburg Research te hi India-a inbun ni se chuan an lakah Unlawful Activities Prevention Act (UAPA) kalpui a ni tawh ngei ang, a ti a. Modi sorkar hian ‘Indira Gandhi era’ a ko let leh tia sawiin, “Constitutional post chelhtuten basic structure chungchang an sawi a, law minister in collegium-ah sawi a nei a, NJAC (National Judicial Appointments Commission) Bill kalpui a nih lai khan MP zingah keimah chauh in Constitution basic structure a kalh a ni ti ka awm” tiin a sawi bawk a.
Owaisi chuan Bilkis Bano sawi langin, “Kum 20 chuang a bei tawh a, mahse justice a la hmu lo, a chhan chu a hming Bilkis Bano a ni tlat,” tiin a sawi bawk.
Congress MP K.C. Venugopal chuan joint parliamentary committee din a nih loh chuan Gautam Adani hausakna dik tak chu hriatfiah a ni thei ngai dawn lo tia sawiin, he sorkar lai mek hi Adani hausakna tipungtu a ni tiin a sawi bawk.
President Address motion-ah thanks a sawi te chhangin Prime Minister chuan a chhang a, mahse, PM Modi-an sawi a neih hmain Opposition te chuan Adani Group chungchang sawihna hun pe duh lo tiin house an chhuah tauhsan a ni.
PM Modi chuan pandemic a leng chung leh, khawvel inthen hrang a, geopolitical buaina a awm chungin India chuan harsatna te huaisen takin a hmachhawn a ti a.
|henawm ram ten buaina an tawh laiin India chu khawvela economy ram lian ber 5-na a ni a ti bawk a. “Harsatna hrang hrang thleng karah, kan hlawhtlinnaah tu nge lawm lo awm ang? Heng vang tak hian khawvelin India a ring a ni,” tiin a sawi bawk.
Modi chuan tun hnai kum kua chhungin startups 90,000 an awm tawh thu sawiin khawvelah pathumna an nih thu a sawi a, India chu khawvela mobile siamchhuaktu lian ber ram pahnihna a ni tawh a ti bawk.
Domestic air traffic-ah India chu pathumna a ni a, renewable energy consumption lamah pawh khawvelah palina a ni a ti a.
PM Modi chuan, “Kan independent hnuah kum 2004-14 kha corruption nasat ber lai” a ti mauh bawk a. “Kum sawm chhung inflation double-digits in a kal a, engkim mai kha midang tihlawm tumna lam hawiin kalpui vek a ni bawk a. Hna vang nuaibo tum te khan mipuite rules leh regulation an kawhhmuh zawk a ni,” a ti a.
“Kum 2014 hma, kum 2004-14 inkar khan inflation a sang hle a. Unemployment nuai bo an intiam a, mahse, kha kum sawm kha Indepenence hnua corrupt ber tum a ni a. UPA kum 10 rorelah khan Kashmir atanga Kanyakumari thlengin terrorism-in ram a tuam a ni. Khang kum 10 chhung khan J&K atanga northeast thlengin tharum thawhna bak hmuh tur a awm lo. Kha kum 10 chhung khan global stage-ah India a chau hle a, tu ram mahin India sawi an ngai pawimawh lo. Kum 2004-14 inkar khan UPA te khan hun remchang apiang crisis ah an chhuah vek” tiin a sawi bawk a, BJP member te kut beng thawm a nasa hle.
“Modi-a rinna nghah hi newspaper headlines emaw TV screen atanga chhuak a ni lo. Mipuite hamthat nan hian ka nun pum ka hmang a ni,” tiin Prime Minister Modi chuan a sawi zui a. Hetia a sawi hnu hian opposition lam chuan ‘Adani, Adani’ tiin an lo auel a, treasury lamin ‘Modi, Modi’ tiin an lo chhawn thung.
PM Modi chuan Modi laka rinna nghahna chu opposition member te hriatthiam phak piah lam a ni a ti zui bawk.