Jordon Centre tihchangtlun dan tur rel

Mizoram sawrkarin ruihtheihthil avanga harsatna tawkte enkawlna tura a duan Jordan Centre Sethawn ami chu tihchangtlun zel dan tur duan a ni.
Social Rehabilitation Board chu Nilaini khan an chairman, Social Welfare minister Er. Lalrinawma hoin an thukhawm a. Jordon Centre tih changtlun zel dan tur leh hmalak dan tur sawi hoin, Jordon Centre-ah hian mipa bik awmna tur khum 100 atanga 200 inkar siam belh turin ruahman a ni. Hemi rual hian he hmuna awmte an thlarau nun thlenga kaihruaitu tur an awm theihna’n hma lak turin leh, Jordan Centre atanga an chhuah hnu ah pawh anmahni puala eizawnna kawng zawh theih tura inzirtir dan ruahman a ni. Hemi atang hian skill training nasa taka kalpui tura tih niin, after care pawh tihchangtlun tum a ni.
Jordon Centre Thingdawl hi Social Welfare department leh sawrkar flagship – SEDP nen tangduna enkawl niin, tunah superintendent hoin thawktu mi 40 vel an awm a, ruihhlo leh chhan dang vanga enkawl ngaite enkawl an ni. He hmuna awm tur hian dilna siam thin niin, heta awmte hi a thlawna enkawl a ni a; an hriselna endik chu National Health Mission Kolasib thawktute kutah a awm a ni. Kumin May 2 khan Social Welfare minister Er. Lalrinawma hian department hotute leh Social Rehabilitation Board member-te nen a hmunah kalin an tlawh a ni.
Thutkhawmah hian a kaihhnawih sawrkar department leh kohhran hruaitu aiawhte an tel a ni.