Joshua Van a champion

Pathianni zing khan Las Vegas khawpuiah UFC 223 neih a ni a, Flyweight kawnghren inchuhnaah Khenglawt tlangval Joshua Van chuan champion lai Alexandre Pantoja lakah hnehna a chang a. champion thar a ni. Kawnghren inchuhna dangah Petr Yan chuan champion lai Merab Dvalishvili hnehin kawnghren a la let leh bawk.
Zo hnahthlak zinga mi Khenglawt tlangval Vana (Joshua Van) inlan a, kawnghren a chuh dawn vangin UFC 223 hian ngaihven a hlawh a. Khawvel hmun hrang hranga Zofaten Las Vegas lam an thlir rawn thuap. Vana a champion theih nana Zofate tawngtai thawmin Zofate Pathian khuanu beng a thleng a, Vana hi beisei phak baka awlsamin a champion.
Fighter tha zet mai Alexandre Pantoja hian Joshua Van a ngam viau a, a tir phat atangin a nawr nghal miah miah. Fight pawimawh takah Vana a zam lova, huaisen takin champion lai a hmachhawn. Chak tuma a khingpui a nawr luatah Pantoja a chesual a, a innemkhalhna lakah a kiu ruh a pelh. Second 26 chhung lek an inhmachhawn hman tihin Pantoja hian hliam vangin fight a hmachhawn thei tawh lova, Khenglawt tlangval Vana chu UFC Flyweight champion thar a ni ta a ni.
Joshua Van Bawi Thawng hi kum 2000 hnu lama piang zingah UFC a champion thei hmasa ber a ni a. UFC-ah champion thei naupang ber dawttu niin a chungah Jone Jones a awm. Joshua Van a champion vangin khawvel hmun hrang hranga Zofate lawmna rawl an chhuah a, Zofate lawmna in van a nghawr thleng. Vana a chak hnu hian a nu chu Lai puan bat chungin octagon chhungah a lut a, hei hian Zofate mit a la leh zual.
Pathianni zinga fight ngaihven hlawh berah Merab Dvalishvili leh Petr Yan ten kawnghren an inchuh nawn leh a. An intawn hmasak zawkah tlawm zawka tang Petr Yan chuan unanimous decision in hnehna a chang a, a kawnghren hloh tawh a la let leh.