Joshua vs Fury a chiang ta! – Hearn

British boxing history mai ni lo heavyweight boxing chanchina mite’n inhmachhawn se tia an hmehbel nasatberte zinga mi ni chungin Briton fighter palian pahnih Anthony Joshua leh Tyson Fury-te chu professional boxing an chawlhsan hnu thleng pawhin hruihrual chhungah an intawng ta lo tluan a, mahse, Thawhlehni mai khan promoter lian Eddie Hearn chuan Joshua vs Fury a taka chang turin mihang boxer zawk Joshua chuan contract a ziak fel ta tih a puang!
World heavyweight champion hlui pahnihte hian boxing inelna an chawlhsan hnuah inlamletin boxing khawvelah an zuanglut ve ve a; tun thla tir mai khan Tyson Fury chuan a comeback fight-ah Arslanbek Makhmudov a tuktlawmn a, London khaw inhnek kha a hmunah Anthony Joshua chuan a thlir a, hnehna a chan hnuah Fury hian Joshua kawk chungin intawn ngei a duh thu hmaichhanah a hrilh nghe nghe a nih kha!
Nikum December thla khan Joshua hi Africa rama a zinnaah car accident rapthlak tak atangin a damchhuak hlauh a; a chuanpui leh a thian tha ni bawk pahnihte bakah an driver a thi tel a, ani kha chu hliam na lutuk tuar loin a dam khawchhuak hlauh a ni.
Kha mi hnu khan a inhnek leh ta miah lo a, July ni 25 khian car chetsualna a tawh hnua a vawi khatna atan hruihrual chhung a lut dawn a, kha mi hnua a comeback fight hmasaber hi Riyadh, Saudi Arabia lama nghah tur niin, Kristian Prenga a hmachhawn phawt ang a, chu mi hnu lam chu Tyson Fury nena an chanchin ni chho tawh turah ngai ang!
|um hnih ve ve world champion ni tawh Fury leh Joshua-te hi thang khat lian chuang zet khawvel hmaa British boxing phochhuaktu pawimawh niin, kha zozai kumah khan intawng turin inbiakna vawi duai lo kalpui thin mah se a hlawhchham zel a, khawvel hmuh chak fight chu tun thlengin a tak hmuh tur la awm lo, tang thawm ang mai a la ni!
Tunhnaia thawm an rawn neihdun leh hnuah promoter Hearn chuan social media kaltlangin hun rei tak heavyweight boxing khawvelin a nghah thlawn tawh ‘fight’ chu tihpuitlin a nih dawn thu leh contract pawh ziah fel a nih tawh thu a puang a, breaking news a ni chiang hle!
Joshua pawh he mi chungchangah hian tawng chhuak ve nghalin, “”Ka lo sawi tawh ang khan ram neitu chuan a ram an luah hawh man a tel dawn a, chu chu a chiang a ni.
“Zep tur pawh a awm lo a, chetsual kan tawhna atang khan ngaiawh leh turin hun ka mamawh hlek a, vawiin hi ka next step atana zinkawng ka zawh tanna tur chu a ni,” tiin Fury nena hruihruai chhunga intawn boruak intan thu a sawi.
Joshua vs Fury kan thlir hun tur ni leh thla bakah khawi hmunah nge he inhnek lian hi nghah a nih dawn tih pawh tunah dinhmunah puanzar a la ni lo a; a hma deuh khan Hearn chuan November thla lam lam daih a nih mai theih thu leh streaming giant Netflix kaltlanga en theih a nih tur thu a lo chhak chhuak zeuh tawh a ni.
Tarlan tak angin, kum 36 mi Joshua hian a chipui kum 37 mi Fury a hnek hmain Arab ramah amah aia kum khata naupang Albanian Prenga a hmachhawn hmasa phawt dawn a; a tum tur hi vawi 20 chak a, vawi khat lek la tlawm a ni.
British fighter Joshua inhnek hnuhnun ber chu lirthei chetsualna a tawh hma chiah nikum December thlaa Jake Paul nen an inhnek kha a ni.
Kha mi thla nawi lamah khan Nigeria rama an zinnaah Joshua driver bakah a team member pahnihin nunna an chan.