“Ka thiam loh a ni,” tih a har kan ti thin

“Ka thiam loh a ni,” tih a har kan ti thin
Elton John-a’n a hlaah ‘Sorry seems to be tha hardest word’ a tih kha a dik khawp mai, kan kawppui te nena kan inlaichinnaah hian “Ka thiam loh a ni,” tih hi harsa kan ti thin a, a thiam lo zawk anga lan khan kan harsat a, dik zawk leh thiam zawk anga lan kan duh tlat thin a, chu chuan kan kawppui te nena kan inlaichinnaah harsatna min siam thin a, kan inkar tichhe tu pakhat a ni.
Eng thilah pawh thiamthu sawi tur hi chu kan nei ve zel a. Ngaihdam dil te hi kan hreh hle a, tlawm zawka tan te hi kan hreh leh tlat thin a, chu chu kan inlaichinna tichhe tu a ni zel bawk si. Inlaichinnaah chuan a thiam zawk leh thiam lo zawk an awm a, a dik leh dik lo zawk an awm a, a chak leh chak lo zawk ang a, a tlawm zawk an awm a tul chhung chuan boruak a dik tak tak thei lo a, inlaichhinna boruak nuam tak nei tur chuan tlawm zawka tang ngam ve ve kan nih a ngai thin.
Ngaihdam dil leh thupha chawi te a pawimawh kan tih rualin, ngaihdam dil dan leh thupha chawi dan a dik leh si loh chuan ngaihdam dil leh thupha chawi ting tang loh kha a tha zawk an ti ve leh tho. The Last Lecture tih lehkhabu ziaktu Randy Pausch chuan, “Dawngdah taka thupha chawi chu thupha chawi loh aia boruak tichhe zualtu zawk a ni,” a ti.
Psychiatrist Dr Sanjay Chugh chuan, “Thinlung taka thupha chawina chuan rah tha a chhuah ngei ngei thin. Chutih rualin tladah leh rilru tak tak ni lem lo, a mawiah ti a thupha chawi ve naran chuan a tha lo zawngin nghawng a nei a, a lo dawngsawng tu a tihel lehzual thei,” a ti ve bawk. Dr Sanjay chuan hetiang a nih avang hian kan thupha chawina tawngkam, aw phawi leh chetzia thlengin a pawimawh hle niin a sawi.
“Ka thiam lo a ni,” tih emaw “Tih palh,” tih hi kan thil tihsual tawh zawng zawng thaireh leh vekna a ni chuang lo a, mahse, mi tam tak chuan kan tihsual ngai bawk tisual nawn foin, “Ka tihpalh. Ka thiam lo a ni, min ngaidam rawh,” kan ti nawn deuh reng mai a, tihsual theihna permit ang deuh reuhah kan hmang ni te pawhin a lang.
“Chutia i ngai haw viau dawn a nih chuan, ka tihpalh a ni, ka thiam lo a ni ka ti mai a ni ang chu,” tih te hi a lo dawng sawngtu tan a lawmawm tehchiam lo. “Ka tihpalh ka tih chu,” han tih deuh hrak mai te hi a dawngtu ni ila kan lawm ang em? “Ka thiam loh a ni. Tikhan i lungawi tawh em!” tih te pawh hian inthawi dam aiin boruak a chawk khawlo zawk ngei ang.
Thupha kan chawi chuan kan dik lohna kan pawm a, chumi avang chuan hrehawm kan ti a, kan tihsualah mawhphurhna lain thupha chawiin ngaihdam kan dil thin. Psychologist Pria Warrick chuan, “Thupha chawia ngaihdam i dil hian i dinhmun a tihhniam phah lo a, rilru tha tak pu leh thinlung taka ti i nih chuan a tichak zawk che a ni,” a ti.
Thupha chawi dawn reng rengin, “Khatiang zawnga i lo ngai daih kha chu pawi ka ti khawp mai, ka thiam loh a ni,” tih loh tur. Hetianga i tih chuan amah kha i mawhpuh let zawk daih tihna a ni a, a ngaihdan a dik lo i tihna a ni daih zawk.
“Min ngaidam rawh, ka lo ruih em vang a lo ni!” tih hi chhuanlam tha tawk a tling lo. Chuvangin ruih thu te hi thupha chawi nana hman loh tur a ni.
Ngaidam tura inkar luih te hi tih loh tur a ni. “Min ngaihdam a ngai a ni mai,” tih ang chi te hi. “Teuh lo mai,” tia chhan a chakawm teh ang chu.
Thupha chawi leh ngaihdam dilnaah, “Ka tihpalh, ka thiam loh a ni, mahse, chutiang/khatiang kha chu ni zawk se hetiang hi a thleng kher lo tur,” tih te mahni inthiam lohna tak tak nei chunga thupha chawina a ni lo. Mawhpuh tur dang a la zawng a, “Mahse” a la ti tang tang a nih hi.
SMS emaw email emaw, WhatsApp emaw Facebook emaw tih vela ngaihdam indil leh te hian a thawk sawt vak lo. |awngka ngeiin, hmaichhanah ngei ni thei se a tha ber.