‘Ka u chesual ka hmuh khan ka hun a thleng tih ka hria’ – Alex Marquez

‘Ka u chesual ka hmuh khan
ka hun a thleng tih ka hria’ – Alex Marquez
Kumin MotoGP zet chu Spaniard Marquez unau lansarh kum niin, team hran ve ve vuan ni mah se podium-ah an dingdun zak zak mai a; Pathianni liamta khan Marquez naupang zawk Alex-a chuan a career-a a vawikhatna’n MotoGP race hnehna a chang ve ta nge nge a, Jerez tlankawnga Spanish Grand Prix hnehna a chan theihna kawngah Gresini Ducati rider hian a u leh a elpui lian ni bawk Marc Marquez-a chesual a hlawkpui tih a sawi.
Home fans101,000 tehreng pungkhawm hmaah a zawna intlansiak tum sarih zet pahnihna ni chho ngar ngar thei Alex Marquez-a hun a rawn inherchhuak ve ta nge nge a, intlansiak zawhah a rilru put hmang sawichhuakin, “Marc-a accident ka hmuh khan ‘OK, vawiin chu ka day a ni ve dawn ta e’ tiin keimah leh keimah ka inhrilh mawlh mawlh a; tlankawnga Marc awm chung pawhin chance chu nei tho mah ila ani ber hmuh tur a awm loh chuan kei hi khawng ber ka ni,” a ti!
Alex chuan sawi belin, “Marc-a’n a hmahruaina a hloh rual khan ka helmet chhanah ‘nooo!’ ka ti vawng vawng a, a chhan pawh hun rei tak tluk loh tuma bei ve ngar ngar kha a ni a, hmuh tur a awm ta lo a; kha thil khan beiseina thar min siam a, ‘vawiin hi ka ni ve tur a ni a, Austin tlankawng ang mai mai khan ka hun tha neih ka bawhpelh tawh tur a ni lo’ tiin ka inbe mawlh mawlh a; ka race vawn laiah ka insawrbing zui ta zel a ni,” tiin a u leh a tluk loh ni thin chetsualnain beiseina leh chance a siamsak thu a sawi.
Marc-a chetsual hnuah Alex khan pathumna luah zui ve nghalin, rider tha pahnih race hmahruaitu ni reng Fabio Quartararo of Yamaha leh pathumna ni zui ta Ducati of Francesco Bagnaia lehpelin lasi thawnthu ang maia hnehna tuihnai a sualchhuak zui ta a ni.
Double Moto2 champion Alex Marquez chuan, “Ka lungnona a kaichhuak chiang hle mai. Fabio leh Pecco-te kha chuan MotoGP-ah zinkawng awlsam zawk an zawh pawh a ni mai thei a, kei chuan kum harsa leh khirhkhan ka paltlang nual a ni,” a ti.
Tun kha 2019 Moto2 title season hnu lama Alex-a grand prix hnehna hmasaber a ni satliah mai lo a, an ram tlankawng Jerez-a a point hlawhchhuah hmang khan MotoGP championship-ah a u lehpelin point khatin hma a hruai zui ta nghe nghe a; result siamthat hnuah Marc kha Pathianni race-ah 12-na a ni a, rider standing-a a hmahruaina a hum zo ta lo a ni.
MotoGP race hnehna boruak a hap rualin Alex chuan bike intlansiak level sang bera hnehtu a han ni ve ta chu Moto2 title pahnih a lo sualchhuah ve tawh boruak nen khan thuhmun rengah a ngai tih sawiin, “Ka chhungte, ka pu leh englai pawha min thlawp rengtu Marc-te hre reng chungin ka hlim hle a ni,” tiin a MotpGP career-a hun chhinchhiahtlak an tawnbuak boruak a sawi chhunzawm.
Pathianni result kan hmuh hnu khan premier class race-ah a vawikhatna’n unau pakhatna ni thei kan hmu ta a, rider standing-a unau a sang pahniha an awm vawikhatna a nih hmel bawk!
Kumin hi MotoGP bika Marquez naupang zawk Alex-a season rukna ni tawhin, Moto2 lama tum hnih ngawt title hawn thei ni chungin a season ruknaah a vawikhatna’n hnehna a chang thei tawk a ni a, chu chuan bike intlansiak premier class race-a hnehtu nih a harzia a pholang chiang mai awm e!
Alex hian LCR Honda lama kum chhia vawihnih a hman hnuin kum 2022-ah a talbuai phat tih a sawichhuak tel a, “Ka la hre reng mai, kum 2022 khan Sachsenring lamah ka la awm a, season chanve a kal tawh a, mi zawng zawngin contract an hum far tawh a, kei kha chuan contract chu sawi loh ngaihventu pawh ka la nei lo.
“Chu tah Gresini ka pan tawp a, ‘in bike hi ka duh, thin dang chu engmah ka care lo. In bike hi ka duh a, ka theihna hmu turin kum khat hun min pe teh u’ ka va ti rawih a, tiin ruaitu a hmuh mai loh laia a harsatnba tawh chungchang a sawi.
Chu chuan awmzia neiin, Valencia post-season test-ah khan Ducati bike khalh chunga a lap hmasa lamah Alex hian a theihna a haichhuak leh tih a inhre nghal a, “Kha kha ka rawn come back leh intanna chu a ni,” a ti.
Kum 2023 khan Gresini vuan chungin Marquez khan podium vawihnih lawnin, tum hnih dang Sprint hnehna a chang zui bawk a; mahse, season liamta khan GP23 khawl lam chak tawh loh avangin a unaupa nen an talbuai zui ta tlat a ni.
Kuminah ropui takin Alex Marquez leh a u Marc Marquez-te tlankawngah a inlan zui ta a; Alex chuan a bike vawn lai GP24 chu a hringnuna a bike khalh tawha tha ber tiin a fak a; fak lo thei pawh a ni nang – tun season race vawi 10 awm tawhah vawikua ngawt lawmman semna dawhsan lawnpui miau hek!