Kala lungte awm lian ber

Kidney stone an ti a, kala lungte awm kan ti ve mai a, lian tak a ni ngai lem lo a, chutih rualin a nawlpui aia lian ve deuh te pawh a awm thin. Sri Lanka-a sipai bang, kum 62 mi, Canitus Coonghe-a kala lungte awm an zai chhuah erawh a lian tha lerh lawrh hle a, 13.37 cm (inches 5.26), 10.55 cm (inches 4.15) a lian niin, an lungte zai chhuah hi a kal (kidney) ai pawhin a lian zawk! Hei hi Guinness World Record chuan kala lungte awm zaichhuah tawh zawng zawngah chuan a la lian ber niin an puang ta a ni.
A hmaa kala lungte awm zaichhuah lian ber record chu 2004-a Indian, Vilas Ghuge kal atanga an zai chhuah niin, 13cm (inches 5.11) a lian a ni a, he record hi a rawn khum ta a ni.
Coonghe kala lungte awm an zaichhuah hian record dang pawh a siam a, kala lungte awm zaichhuah lian ber a nih bakah, kala lungte awm zaichhuah tawhah chuan a rit ber a la ni a, gram 800 a rit a ni! A hmaa kala lungte awm zaichhuah rit ber record chu 2008-a Pakistanni Wazir Muhammad kal atanga an zaichhuah nin, gram 620 a rit a ni.
Coonghe record siam kidney stone hi a kal dinglam a awm nin, Army Hospital, Colombo, Sri Lanka-a urological team ten an hmuhchhuah a ni a, Coonghe kala lungte awm hi open pyelolithotomy an tih ang chi a lak chhuah a ni a, Dr Kugadas Sutharshan-a’n a zai a ni. Hetiang khawpa lungte lian an zai chhuak chung pawhin Coonghe kal hian chhiatna dang a nei chuang lo niin an sawi a, a thin, mìt, pancreas leh la (spleen) te pawh a size a normal vek a, a prostate erawh a lian deuh thung.