Kalki 2898 AD ticket leitu mtd 20 tling

June ni 27-a an tlangzarh Indian film Prabash, Amitabh Bachchan, Deepika Padukone leh Kamal Hassan te channa ‘Kalki 2898 AD’ en tuma cinema hall ticket leitu maktaduai 20 (vaibelchhe 2) an tling tawh a, kumina India film tlangzarh tawh zingah ticket hralh hnem ber a la ni.
He film hi cinema hall-a an chhuah tan ni, a ni khatnaa cinema hall ticket hralhna atanga cheng vaibelchhe 95.3 la lut nghal thei kha a ni, ni li chhungin India-ah cinema hall ticket hralhna atangin cheng vaibelche 309 a la lut thei a, khawvel huapin kar khat chhungin cheng vaibelchhe 600 a la lut tling thei a, tun weekend-ah hian cheng vaibelchhe 1,000 a tlin hman dawn niin an chhut.
He film hian an tlangzarh atanga ni ruk chhung lekin ticket leitu vaibelchhe 2.02 a nei tling hman a, Telegu version chu ticket leitu ngah ber niin, vaibelchhe 1 an tling a, Hindi version-in dawtin, 75,00,000 ticket an hralh thei a, Malayalam leh Tamil version-ah 28,00,000 ticket an hralh thei bawk.