Kalphung thar zawrh an zawm lo fai vek – MNF Thalai V/C

Kalphung thar zawrh an zawm
lo fai vek – MNF Thalai V/C
Kum 2018-a ZPM-in kalphung thar, tia an zawrh chu an MLA ten an zawm lo fai vek niin MNF Thalai vice president Zodinpuia chuan a sawi.
Zirtawpnia Tuivawl South Block MNYF Conference, Kepran-a neih a hmanpuinaah MNF Thalai Hqrs. vice president chuan kum 2018 MLA inthlandawnah ZPM hian kalphung thar an tlangaupui a, hemi tuma an kalphung thar zawrh chu MLA hlawh sang lak loh, MLA lirtheia designation plate tar loh, tih vel niin, mipui duhsakna dawngin tunah MLA 6 an nei a, an MLA zawng zawng hian 2018 inthlan dawna an kalphung thar zawrh kha pakhatmah an zawm lo fai vek tih a sawi.
Kuminah pawh ZPM hian kalphung thar bawk mipuiah an zuar leh a, vawiin thlengin ram inkaihhruaina chungchangah kalphung thara kal an tum dan chu mipui hnenah sawi tur an la hre lo niin a sawi bawk.
Mizo Union leh ZPM kaldan chu a inang hle nia a hriat thu Zodinpuia hian a sawi a. “Nihna duh vang leh ram roreltute itsikna avanga political party din reng reng a daihrei ngai lo,” a ti.
MNF chu ralthuam leh sipai chakna hmangin kum tam tak chhung rawt chimih tuma beih tawk tawh ni mah se, vawiin thlengin Pathianin a la humhim a, Zofaten zalenna famkim kan neih hma loh chuan Zoram zalenna meichher kengtu a la ni zel dawn tiin a sawi. Hnam nunzia leh sumdawnna lamah pawh chimralna kawng kan zawh thui hman viau na in, heng zawng zawng hi MNF chuan rawn thiatin, Mizo mipui thinlungah Mizo hnam hmangaihna chinung a tuh a, tun thlenga kan sakhua leh kan hnam humhima a awm chhan chu MNF vang a ni tih MNF Thalai hruaitu hian a sawi a. Kumin kumtawpa MLA inthlanpuiah MNF-in sawrkarna a chang leh ngei dawn tih a sawi a ni.