Kan chipuite tawrhna chu kan tawrhna: CM

Mizoram chief minister Zoramthanga’n Manipur buainaah Zo hnahthlakte’n an tuar nasa tih a sawi a, “Kan chipuite tawrhna chu kan tawrhna a nih miau avangin ngawihsan theih a ni lo,” a ti. Chief minister hian Instagram-ah Manipur buaina chungchang hi a post a, buaina chinfel dan kawng dap a tul thu leh a rang thei ang bera ngaihtuah a ngaih thu te a sawi.
“Sakhaw hmun serh biak in hal leh khawih chhiat te, tualthahna leh buaina nghawng tawrhna rapthlak tak tak thlalak leh video te hi hmuh belh tur awm tawh lo se ka duh a; buaina chinfel dan hi kawng khat chauh a awm a nih pawhin chingfel tura hma lak nghal ni se tih hi ka duh dan a ni. Manipur buainaah hian mi tam takin nunna an chan tawh a, thisen tam tak a luang ral tawh a, hliam tuar leh sahimna zawnga hmun dang pan mi tam tak an awm belh zel bawk a, chung zingah chuan ka chipui Zo-hnahthlak tam tak an tel a, kan chipuite tawrhna chu kan tawrhna a nih miau avangin ngawihsan theih a ni lo! ” a ti.
“Nunrawng taka nunna inlaksak leh insawisakna thleng phei hi chu a demawm lehzual a,” a ti a, buaina chinfel dan kawng rang taka ngaihtuah a tul thu a sawi rualin, he buaina hi a reh hun tur hriatthiam a har thu a sawi.
“Buaina a ziaawm zel kan beisei laiin a punlun ta zawk a, a reh hun tur hriatthiam harsa tak a ni tawh!” a ti.
“Manipur buaina avanga hliam tuar leh nunna chan te, in leh lo chante leh buaina avanga harsatna hrang hrang tawkte ka tawrhpui tak zet a, Pathian thlamuanna leh awmpuina ka dilsak a ni,” a ti bawk.
Manipur buaina avanga sahimna zawnga Mizorama tlanlut hi mi 12000 chuang an nih tawh thu a sawi a, Manipur, Myanmar leh Bangladesh atanga raltlan, Mizoram sorkar a enkawl mek hi mi 50000 chuang an nih thu a sawi.
“Heng raltlante leh sahimna zawnga Mizorama rawn tlanlut kan unaute enkawlna leh chhawmdawlna tur central sorkar atanga puihna kan dil pawh hi a rang lama pek kan nih thuai ka beisei tlat a ni,” a ti a, a thu post hi prime minister, union home minister leh Manipur chief minister te a tag a ni.