Zirlai pawlin hna lak dan a diklo ngeia hriat thu thlen

izo Zirlai Pawl leh Mizo Students’ Association chuan Assembly Secretariat hotute hnenah an hnuaia hnalak danah thil diklo, induhsakna a awm ngei nia an hriat thu an thlen.
Thawhlehni khan MZP Gen. Hqrs leh MSU Gen. Hqrs office bearers chuan joint meeting neiin, tunhnaia Mizoram Legislative Assembly Secretariat hnuaia translator, assistant, lower division clerk leh upper division clerk hnalakah thil fel tawk lo leh chhungkhat laina, vua leh vang induhsakna uchuak a awm tih thuthang chu sawihoin, zirlai lehkhathiam tling leh tlakten an thiamna phu tawk an hmuh theihna’n leh dik leh felfai taka hna an hmuh theih an duh ber a. Zirlai hna zawngte tibeidawng zawnga hnalak kalpui a ni chu hriatthiam har a tiin mawhphurtute a dem takzet tih a sawi. He thil hi Mizorama hnalak reng rengah thleng nawn tawh lo se an duh tih a sawi bawk.
He thutkhawma rel angin Mizoram Legislative Assembly Secretariat hna lak dan kalphung leh hnalak dan document hrang hrang zirchiangin an endik hnu ah Assembly Secretariat commissioner & secretary chu a office-ah hmu nghalin, thil awmdan an zawtfiah a, hnalak kalpui danah thil fello a awm ngeiin nia an hriat thu an thlen.
‘Assembly Secretariat thuneitute chu 2023 July 6 ralhma ngeia hnalakna order hi cancel vek tura ngen an ni a. Ni 6 hmaa cancel a nih loh chuan Mizoram Legislative Assembly Secretariat office kawtah zirlai punkhawm nise,’ an ti. Zirlai pawl ngenna hi zawm ngei turin thuneitute an beisei tih sawiin, zirlaite dikna chanvo humhalh a nih theihna’n a tul angin hma an la zel dawn tih an sawi a ni.