Fate hnenah an ngaihhlut tur dik kan zirtir uar a tul hle tih Social Welfare minister Er Lalrinawma chuan a sawi.
-- Advertisement --
Tawi Tlang Block MHIP Conference vawi 11-na Hualtu khuaa neih a hmanpuinaah Er Lalrinawma chuan chhungkua, khawtlang, ram leh hnam thila hmeichhiate an pawimawh zia chu sawifiah phak a ni lo, tiin, an sukthlekin nasa takin kawngro a su zel thin tih a sawi. Ram leh hnam huap thilah pawh MHIP ten hmalakna ropui tak tak an neih tawh thin chu an chhunzawm zel a beisei tih a sawi.
“Kan fate hnenah ngaihhlut tur dik kan zirtir uar a tul hle a, ram mipuiin nun kawng dik kan zawh deuh deuh theih nan mahni fate theuh hnena taima taka kan tuh thin a tul. Hnam dang chimralna laka kan him theihna tur kawngte, mahni hnam ziarang hlutthiamna lam thilte, Zonun zemawi inzirtir zelna lam te pawh kan uar zel tul a ni,” a ti.
January 18-24 chhungin National Girl Child Day chu Beti Bachao Beti Padhao Scheme kaltlanga hman a ni tih Social Welfare minister hian a sawi a. Fanute venhim leh zir puitlin tir chu Beti Bachao Beti Padhao (BBBP) thil tum pui ber a nih avangin tuna MHIP conference thupui “Tu leh fate ruihhlo laka fihlim tura tan lak” tih nen pawh a inmil hle, tiin, BBBP chu hmeichhe naupangte hmasawnna tura sawrkar laipui hmalakna pawimawh a nih avangin MHIP member-ten ngaihven deuh deuh se a duh tih a sawi a ni.
MHIP Tawi Block huamchhungah hian branch 19 an awm a. Conference-ah hian “Naupang enkawl dan leh ruihhlo that lohna” tih zir ho a ni.