Ration buhfaia mipui harsa zawkte khamkhawp lohna chu state sawrkarin a phuhrukna tur a ruahman lo a nih chuan an enliam mai mai dawn lo tih Congress Thalai chuan an sawi.
Congress Thalai Hqrs hruaitute chuan ration buhfai pek tihdanglam chungchangah an president Dr Lalmalsawma Nghaka hoin Food Civil Supplies & Consumer Affairs directorate an tlawh a. Sawrkar laipuiin National Food Security Act 2013 a hman tan atangin Priority House Hold/ PHH (card pawl) te tan kg.5 Rs.3-a central-in a tum thinah Mizoram sawrkarin khamkhawp lo ven nan kg.3 PHH te tan AAY rate-a a pe tel thin thu an sawi.
-- Advertisement --
2022 December 24-a Union cabinet chuan NFSA hnuaiah Pradhan Mantri Garib Kalyan Ann Yojana hmangin December 2023 thleng PHH beneficiary-te tan mi pakhatah kg.5 leh AAY (card eng) te tan card khatah kg.35 a thlawnin buhfai a sem tawh dawn tih Dr Lalmalsawma chuan sawiin, “Hei hi a lawmawm rualin, Mizoram sawrkarin PHH beneficiary-ah mi pakhat tan kg.5 an khawpkham lo tih hria a, an khamkhawp lohna phuruk nan AAY rate-a kg.3 a pek thin a tawp dawn niin kan hria a, chhawmdawl mamawh ber miharsa zawk leh dinhmun thalo zawk manganga siam hi pawi kan ti a. Kg.3 AAY subsized rate-a an lak chhunzawm theih nan sawrkarin ruahmanna a siam lo a nih chuan Congress Thalai chuan a enliam mai mai dawn loa, miharsa zawk leh chhawmdawl ngaite tan a ding zel a ni,” a ti.
MNF sawrkar hian thla tlemte sawrkarna hun leh mipui tan rawngbawlna hun tlemte a la neih hi mipui tan thil tha ti ngam tawh turin kan chah a ni.