Kan inhumhim thiam em?

Special Intensive Revision (SIR) kalpui mekah hmun thenkhata voter pung chak lutuk chuan rinhlelh a hlawh a, uluk zawka enfiah tura tih a ni a. Hmun thenkhata mihring pung chak lutuk hi, Census behchhana mihring pun dan atanga teh chuan, thil thleng thei lo tura ngaih a ni. He thilah hian NGO lamin aw (voice) chhuah ta lo se, a buaipuitu (Mizo tho) te hian ngaihthatlohna nei chuang lovin an kaltlangpui mai ang em(?) tih hi ngaihtuah theih tak a ni.
Kan thupui ang hian, Mizo ten zawhna inzawh tur pawimawh tak kan neih chu- “Kan inhumhim thiam em?” tih hi a ni. A chhanna chu kan tun dinhmun mek hi a ni mai a, chu chu ‘kan thiam lo’ tiin a sawi theih ang.
Him kan duh a, inhumhim kan tum a, kan sawi a, kan thawk bawk a, “Hei baka inhumhim thiam hi a awm theih chuang em ni? te pawh kan ti maithei e.
Ni e, him kan duh a, ‘inchimral’ tih tawngkam pawh kan leklam narawh e. Chimrala awm hi kan hlau em em a, hlauh tur pawh a ni; mahse, tuna inhumhim kan tum dan hi chu ‘inhumhim thiam’ anga ngaih theih chu a ni hran lo ang.
ILP hmangin kan inhung a, tunah pawh ILP nei lo kan man chhuak a, kan thawn haw zel a, hetianga kan kal reng theih phawt chuan hnamdang hian min chimral lovang’ kan ti a ni mai thei.
Ni e, ILP hmangin, dan ang thlapin an lo lut alawm. Heng ILP nena kan ram min rawn awmchilh mektute hian Dan angin lang lo lamah min chim pil mek chu a ni ber.
Inchimralna sawi chuan kan chhehvela thil thleng, Tripura dinhmun te, Khasi dinhmun leh Cachar dinhmun te hian sawi chhuah a hlawh chawk a. Tripura inchimralna hi India ramah chuan assimilation nasatna ber a ni hial maithei. A lo intan dan pawh thil ho tê anga lang, ho miah si lo a ni. Kum zabi 15-na laihawl vel atanga intan a ni a, lo neih dan an thiam loh avangin lo neih dan thiam Bengali rual an chah lut a, chuta tang chuan tun dinhmun khu an thleng ta a ni.
Keini ve hi le? Cement khawih dan kan thiam lo a, cement khawih thiam kan chah lut ruih ruih a, ILP an rawn hum lut fur a, ngaihtha takin kan lo mikhual a. Tunah chuan kan harh chhuak ve mek a, kan lehthal theih hun a thlen meuh chuan, kan ram hausakna thau (sum leh pai) an ram lama an thawn haw hi a turu tawh viau ang. Cement hna chauh a ni lo, tuna Mizorama hnam dang (Vai) ho hnathawh hrang hrangte hi Mizo ten kan tih ve theih vek a ni. Tih nachang hriaiin ti duh ila, anmahni ai aia thiam tur thiau kan ni; mahse, hei tunah chuan economy issue hnuaiah min chimral mek chu a ni ber. Thil dang pawh tam tak a awm. Kan harh tlai a nih pawhin, ‘harh loh ai chuan harh tlai pawh a pawi lo’ tih hi kan changthlan mai a ngai ta chu a nih ber hi!