India sawrkar laipui chuan ram inrelbawlna langtlang taka a kal theih nan state tinin an hman tur dan tha tak Right To Information Act, 2005 a siam a. He dan hmang hian ram chhung mipui tu pawhin sawrkar inrelbawlna hnuaia hnathawh leh hmalakna hrang hrang a duh apiang a zawt thei a; mahse, security khawih pawi thei tur erawh a huam lo.
RTI Act hi khua leh tuite pawhin an hmang tangkaiin, he dan avang hian thil dik lo tur tam tak pawh siam that a ni tawh nghe nghe. Mizoramah pawh he RTI Act hmang hian eirukna thenkhat chu phawrh chhuah tawh niin a mawhphurtute pawhin hrem an tawk thin.
Hetih lai hian RTI-in ti tura a phut point hrang hrangte ti duh lo sawrkar department engemawzat an la awm mek a, Information Commission lamin an koh ngai hial khawpin an awm nghe nghe a ni.
RTI Act hmanga information diltuten harsatna an tawh zinga langsar tak pakhat chu, ‘rei tak nghah ngai’ hi a ni.
A nihna takah chuan RTI Act hmanga information dil chhuah kher ngai lovin sawrkar department hrang hrang hian an website theuhah an department hnathawh dan leh thiltih reng reng an chhawp chhuak tur a ni a, chutiang atan chuan sawrkarin hmanrua engkim a chhawpchhuahsak vek nghe nghe a ni. Han click zeuh a, hun rei lote chhunga information hriat duhte hriat zung zung theih tura mipui tana chhawpchhuah hi an mawhphurhna leh an tihtur duty a ni.
Hengte hi department lamin an tih duh miau loh avangin mipuiin RTI Act hmangin harsa takin information dil chhuah a lo ngaih phah a, RTI hmanga information dil chhuahte pawh hi a hnuah an website-ah hmuh zui tur a awm leh chuang lo. Kan langtlang lo hle a ni.
Langtlang tur chuan dan zawm that a ngai a, dan zawm tha tur chuan thupek kenkawh that a ngai a, thupek kengkawh tha tur chuan thahnemngai mi nih a ngai a. Kan langtlang lo a nih chuan ram leh hnam tana mi thahnemngai hi kan awm meuh lo tihna a ni ber awm e.
Kan langtlang lo?
Get real time updates directly on you device, subscribe now.