KAWNG |HAIN A CHHE LAMIN MIN NGHAWNG THEI

By Hlimpuia Chhakchhuak
Kan ram leilung awm dan en hian kawngpui zau leh tha tak tak kan la nei ve lo hi Pathianin kan ram min venna a ni mai awm mange ti tein ka ngaihtuah rum rum thin, motor lian tak tak te hian duh duhin min rawn paltlang ve zung zung thei se kan thing leh mau te hi tun ang hian kan humhim reng zo ang em? Mizoram Economy lah hetianga chenbeh hi a la ni rih si.
Amazon Basin huam chhung ringawt pawh hi India ram aiin a lian zawk a, he mi huam chhung ram hrang hrang awm te hi Economy tha tia sawi tur an awm mang lo, a mipui chengte lah an fing var bik vak si lo, khawvel changkanna a’n lut a, an environment in a tuar nasat zia chu buaipui tham a tling chho mek zel chu a ni.
Mizoram pawh kawng tha neia changkan belh tumin a insingsa mup mup mek zel a, kan kawngpui laih dan leh leivung paih dan hi kan vei a, kan buaipui a ngai tak zet zetin a lang, tuna kawngpui laih vung hi a tam zawk chu lui leh kawr ruamah paih niin a lang a, heng ho hi kan luipui hoah a lut tawh a, a lut zel dawn tih chu zawlnei ni kher lo tan pawh sawi chian theih sa a ni. Luia nungcha ten an tawrh theih dan chu a lan chian sa em vangin, he lam chu sawi pel rih ila, tuna ziak leh chhiar thiam ten kan tawrhna tur chauh pawh hi sawi tham fe a awm ang, tun anga leivung mumal lo tak a kan paih reng chuan kan tu leh fate, tun huna ziak leh chhiar pawh la thiam lote thleng hian an tuar dawn chauh ni.
Tuna kawng laih tawh sa vung ringawt pawh hi tam tak a ni tawh, heng ho hi kan lui dungah lutin tui chim chin a rawn ti sang ang a, luipui hnaih khua ho hi an buai a zualin, kan thing leh mau thleng hian a chim chhe tam dawn lutuk, tui chhungah thing leh mau an nung thei lo, hei ringawt pawh hi ngaihtuah tham fe a tling. Tui chim chin sang hian, ecological balance ti buaiin, mihring in nasa takin kan tawrh phah mek a, kan tawrh phah zel dawn a ni.
North Pole leh South Pole-a vur tlang lian (Glacier) tui mek zelte hian khawvel environmentalists te lu a tihai takzet ta a nih hi, Mizoramah hetiang em ni lo mah se kan ngaihtuah chian a hun ve tak zet ta. Kan tlangram lo neih dan hi han sawisel thin mah ila, tih tak takah chuan lo neih loh hnuah thing leh mau, hnim chi hrang hrang a rawn to leh tho, environment ti chhe tho mah se, zaa sawmsarih chu a rawn recover leh hial ang, tuna kawngpuiah hi chuan eng thing leh mau mah a rawn awm tawh lo ang, kawng laih loh tur tihna lam ni loin, kan leivung paihna hi thlang ulukin, lui hnaih lo ram zel lo thlang ila, leivung paih loh hnuah thingte phunin thenkhat lai phei chu park nuam tak takah a chantir theih hial ang.
Mizoram kawng laih hian a tam zawk chu thingtlang a paltlang zel a, a khaw paltlang VC, YMA etc te an fin a, hma an lo lak chak ve deuh deuh a ngai a ni. An huam chhungah Spoil bank/ Dumping Ground tha tur direct deuh a lui pawh lo lai an zawnpui vat vat a ngai tawh viauin a lang.
Ngaihsam deuha kan awm rei lutuk chuan, ka hriat tawha tui len ber tum a ni tih hi kan sawi vat lo ang tih sawi har tak a ni tawh, hei hi kumin furah pawh fiah theih a ni ngei ang.
Tui chim chin sang hian ken tel, lui hnaih lei min a nei ngei anga, kan lui dung luan dan pangngai danglam vak vak pawizia tur hi tuna sawifiah thiam mai ai hian a la nasa ang, khawvel ram dang tawrh dante thlir hian.
Lei vung paihna hian nghawng a neih thuizia leh nghawng a neih pawizia Aizawl bika lei vung kan paih tawhna niawm rinthu sawi ta ila, rinthu a nih vangin lo ring lo pawh awm se a dik ngei ang tiin ka tang tung lem lo?
Rangvamual kawng Edenthar veng huam tlahniam reng leh mihring leh In tam takin a tawrhte hi… Zarkawt tlanga High Field kan tih Chief Minister Bangla bula Field an siam laite hian khawnge an paih ang? Tuna a ram awm dan ngaihtuah mai leh a hun lai ngaihtuah khan lei vung paih turin motor leh a laihna hmanraw tha a la awm hmel si loh, a ko sang lam Chanmary huam leh Edenthar lamah hian paih a, nawr liam thlak a ni mai lo maw?
Ramthar veng, Sihpui ruam tlahniam vakte kha… Laipui tlang an laih lai khan Chaltlang lamah phurpheiin lei vung an paih a rinawm lutuk lo, a kham lam tuna Chanmari leh Ramhlun road lamah hian an paih liam ang a, a zawl deuh lai Sihpui ruamah in chhek khawl in, mihring cheng leh In ding a tam hnu khan tiang khan a che ta vak a ni thei ang em? Tuithiang Veng chung lam, Saron Veng lei min vakte kha… Sipai Lammual an laih lai khan lei vung khawnge an paih ang? Tuna kan sawi veng lamah hian an paih a ni mai lo maw?
Ramhlun Sports Complex hnuai lam che vak, mi tam takin an tawrh nate kha… Ramhlun field an laihna vung khawnge an paih ang a, tui tling thei lo tura siam a nih in, field-in fur tui tam tak a dawn ten khawnge chhuahna an zawn ang, field thlang lam khan an tuar ta vak a ni mai lo maw?
Chuvangin kawng tha te leh hmasawnna tam tak pawh a lo la kal zel ang, kan mamawh ber a ni em, hun lo kal lehzel tura atan enge nghawng a nei theih, tih chik taka kan ngaihtuah hmasak thin a ngai a, keimahni tana chhiatna min la thlen thei tur thil a nih dan zir chian hmasak a, fimkhur taka hmasawnna nia lang tam tak hi kan lo hmachhawn thin a tha hle a ni.