Kan nihna diktak kan inzirtir tawk lo – R Tlanghmingthanga

Hnam thuthlung kengtu MNF an nihnaah an infuih that deuh deuh a tul a, an nihna diktak an inzirtir tawk lo tih MNF hruaitu R Tlanghmingthanga chuan a sawi.
Thawhtannia MNF office Mizo Hnam Runa inkhawmah MNF National Core Committee member R Tlanghmingthanga chuan, an nihna dik tak an inzirtir tawk lo thin nia a hriat thu hi sawiin, “Kan founder president Pu Laldenga ho khan Vai tlangvalin Mizo nula an kalpui ral ral kan hmuh khan kan rilru a na a, Vai tlangvalin Mizo nula an kalpui a nih chuan an karah kan tlazep ngam tur a ni, kan ti a; chumi ti ngam lo chu pawnfen feng tlak kan ni tihna a ni,” a ti.
Pu Laldenga leh a thuihhruai khan Mizo hnam humhalh thupui bera neiin, hnam damna tura thawhna hmanraw tha ber chu independent a ni a, independent puang tur chuan Mizo National Front hi a lo piang ta tih a sawi a ni.
“He hnam thuthlung kengtu chu MNF a ni a, kan pasalthaten kum 20 zet thi leh thau pawlhin nunna thapin an bei a, hnam ral lohna tur leh min chimral lohna turin India mipui danna atana independent kan sual a ni tih an hria a. Inremna atan pawh phal takin, in state boundary chhungah in sawrkar thu loin tumah an lo lut loanga, in state inenkawlna senso indaih lohna pawh special category state enkawlna zulzuiin enkawl in ni ang, tih chu India Constitution Article 371G ah dahluh a lo ni ta a ni,” MNF NCC member hian a ti.