Kan vela hnamdangte an pun thur thur laia Mizote kan pung chak lo lutuk chu ngaihtuah thar sen a ngai tih minister Lalruatkima chuan a sawi.
Govt Aizawl West College chuan College Week kharna leh tunhnaia NAAC B++ grade an hmuh lawmna chu Thawhlehni khan an hmang a. He hun hmanpuitu I&PR minister Lalruatkima chuan Mizote chu hnam anga dingchhuak tura kan inbuatsaih loh chuan kan chesual thei tih sawiin, “Kan pung chak lo em em a, chutihrualin kan vela hnamdang awmte an pung thur thur; zirna leh hnathawh min tibuai khawpin thalaiten social media kan buaipui a. Nula tlangval nupui pasal neih tum lo kan pung zel. Ngaihhtuahna thar hman kan ngai a ni,” a ti.
Mi tam takin chhe vek tawh angin Mizo hnam chu sawi thin mah se, chutiang chu kan ni loa, statistics mumal tak nei ila kan thalaite hi an lo la chhe lo tih kan hre thei ang, tiin, tan lakna tur erawh tam tak kan nei tih a sawi a ni.
Lehkha zir chu kawng engkima hmasawnna a ni tih hre chung a, an thiam leh theihna tipung zel turin minister hian zirlaite chu a chah bawk.
Govt Aizawl West College hi 1990 May 2-a din a ni a. Tunah hian zirlai 1098 awmin, zirtirtu 43-in an enkawl mek.
Kan pung chak lo hi ngaihtuahna thar sen a ngai – Lalruatkima
Get real time updates directly on you device, subscribe now.
Prev Post