Kan Ram Mamawh

Lalchhandama Colney
Ph – 9862982321

Kan ram mamawh han tih ngawt mai chu, a zau hek hawk hle mai, mamawh kan tih zawng pawh a inang lo hlawm hle mai thei a ni. Mihringte pawh hian mamawh kan nei a, chung zinga a tul zual puite chu, chenna tur, eitur, tui-te pawh han ti ila a dik thei tho ang chu. Chutiang bawk chuan kan ram hian mamawh a nei a ni-ram hruaitu tha, ralmuanna, sik leh sa tha leh a dangte pawh a tam ang. Kan hriat theuh angin Mizoram chu zim te a ni a, a mi chengte pawh kan tlem hle. Kan vannei a ruahtui kan dawng tha a, thlai ilo engkim mai a tha duh hle. Kan harsatna tawh ve thin chu, leimin, lei tawlh, kawng chhe ta thin lutuk te a ni. Hetih lai hian changkanna avangin ramngaw-te kan ti chereu ve nasa hle tawh a, kan lui neih hote pawh a tlem sawt hle.Awle,sawrkar thar kan nei a, a kum khatna an hmang tan mek a, vawiinah kan ramin a mamawh nia ka hriat ve ang ang te han sawi tum dawn ila. An policy leh manifesto tha tak tak te zingah tel tho mah sela, han thlur bing deuh te kan han nei dawn a ni.
Ei Leh Bar – Hei hi chu kan chiang viauin ka ring, a tlangpui thuin ni tin vawi hnih chaw kan ei a, chhun thingpui, chawhnu, a thenin zan lamah te pawh thingpui kan in bawk. Heng a mi zawng zawng deuh tho hi state dang atanga kan lak luh a ni, a leina tur pawisa pawh chu kan thawhchhuah a awm mang lo. Kan pi leh pute hun lai kha chuan kan intodelh ve em em a, mahse, vai len hnu hi chuan ration buhfai tlawm te tea lei tur a tam tak avang hian loneih chu kan peih ta mang lo, a lo rei hnu phei chuan loneih chu hna hnuaihnung, hlawk bawk si lo a lo ni ta a ni. Kan ni tin eitur te chu phai rama mi kan ring ta deuh vek a ni ta mai a, loneitute chu kan ngaisang lo, awt lo khawp mai. Mahse, vawiinah chuan ka buai leh si a ni ta ber a nih hi, kan chawkluhna kawng emaw a buai chuan chuti hlauh chu kan ni ta. Chuvang chuan, kut hnathawktute dinhmun kan chawisan a ngai, loneih lam kan uar a, intihhmuh theih nan.
Sum Leh Pai – Bible-a kan hmuh dan chuan sum ngah hi mihring damchhan a ni lo, a ti. Mahse, ringtu tha a nih chuan kawng engkimah a lo hmuingil a, taimak em avangin a lo neinung viau thin a ni. Hetih lai hian Kristian ni ve lem lote pawh an lo hmuingil a, neinung em em thei tho a ni. Zoram khawvelah pawh sum leh paia intlansiakna a nasa, a then te phei chuan dik lo takin ka ti ta thin a ni. Khawtlang leh kohhranah pawh a neinung deuh leh nei lo deuh chu tlemin kan enhrang, thlir dan deuh kan nei a maw ni chu aw, a tih theih. Khawvel a ni a, a hausa deuh leh rethei deuh te chu awm ve tur ngei chu a ni a, chuvang chuan, a tlan pawh kan intlansiak nasa. A theih dan danin pawisa kan puk(Loan) a, in kan sa a, lirthei chi hrang hrangte kan nei bawk a, thawmhnawte pawh a man to to, chhuak thar apiang kan nei, kan lan dan mai atang chuan nei awm tak, changkang awm tak kan ni. Chutiang bawkin sawrkar pawh a lan mai dan atang chuan changkan hmel viau mai, mahse, kan sawrkar hian account balance a nei miah lo, nei lo mai pawh a ni lo, cheng tam tak a ba teuh zawk a ni. Ram sum leh pai dinhmun hi mutmawh hnarmawha kan neih a, kan siam that thuai a va tul em.
Moral Reform – He thu pawh hi kan hre viau hlawm tawhin ka ring, kan sawina a la rei lo na a, tlem tlem chuan kan ngaihven ve deuh tan ni chuan a hriat. Zan lamah traffic duty awm tawh loh hnuah chuan kan duh dan danin kan tlan tawh mai thin. No Parking, tih alo intar kuau a, mahse, mi tuman min hmuh loh chuan, kan dah zuai, kan ti mai thin.Kan ngaihsan em em sapho leh khawchhak hote pawh hian hetiang hi chuan an ti ngai miah lo, chuvang chuan alawm heti lai hmarchhak kilkhawr ber thleng pawh a kan lo hriat. An changkang em em a, rinawmna, pawisaknate pawh an keng tel zel a ni, keini pawh engtik ni emawah chuan mi hmuh lai chauh ni lo, hmuh loh lai pawh in rinawmna, thuawihna, kan la nei ve mai thei asin. A tul huna dik mang lo a thil kan han ti mai thin pawh hi ngaihtuah ngun ngai ve in ka hria. Sawrkar kan hmuh dan, sawrkar-in min hmuh dan te pawh hi eng ang nge la ni aw, pawisa in a si thlu vek thei alawm kan la tih chuan, thil chiangkuang vak lo a awm thin, tihna a ni ngei ang. Kan rilru sukthlek siamthat lam hi chu kohhran lam tih tur awm zawk tak a nia, mahse, ram hruaitute hi an pawimawh em em tlat mai, an langsar, hmuh leh hriat tam ber an ni.
A mamawh loh ho chu-eirukna, thamna, induhsak bikna, thiangzau lutuk na, tlak hlauhna, hausak loh hlauhna, etc., te han ti ila, a kim viau mai thei. Kan ramah chuan MLA rethei deuh, Minister rethei deuh leh thil dik mang lo chu, tu pawh ni se, lo hnar ngam thak thak ang chi te hi kan hrethiam mang lo tlat, an lo awm a nih chuan kan phun nuai nuai ang a, inthlan lehah chuan candidate nih pawh an chang lo hial mai thei. Mizote kan tlem a, kan inhre chiang tlang viau hlawm a, chutih laia, a theih loh, ka ti thei lo, lo ti tu, hre thiam thei lotu chu kan ngaithiam mang lo tlat thin. Hetih avang te pawh hi aniang kan hruaitute, department lam hotute pawh hian an pawm zam leh mai thin, mahse chu chu kan tlakchhiatna tur, leiba kan ngah zelna tur a lo ni ve reng a ni. A tawp berah chuan kan mamawh kan han sawi te leh a dangte nei thei tur chuan ram hruaitute in pawimawh em em, intihdan a nih chuan rei lo teah mipuite chuan kan pawm zel mai ang, mipuite chuan thil tha neihna tur a nih dawn chuan kan inhuam ve viau tawh a ni.