Kan remna nghehna kan hriatchian lehzual a ngai – Zoramthanga

Remna in a hrinchhuah Article 371G chu state dangin special provision an neih ang a ni lo a, Mizoram remna thatna leh nghehna chu kan hriatchian lehzual a tul tih MNF president Zoramthanga chuan a sawi.
Thawhtannia MNF office, Mizo Hnam Runah Remna Ni lawmnaah MNF president chuan remnaah hian India ram aiawhin Union Home secretary RD Pradhan, Zoram mipui zawng zawng aiawhin chief secretary Pu Lalkhama, ramhnuai leh ram chhunga MNF zawng zawng aiawhin Pu Laldenga ten hming an sign a. Tumah ralbang bik awm loin kan zavaiin kan tel a, a humhim pawh kan zavaia mawhphurhna a ni, tiin a sawi.
Central-a BJP hneh taka a sawrkar lai khan Jammu & Kashmir chungchang ziahna chu India danpui atangin nuai reh a ni a, 2024 inthlanpuiah MP 300 chuang neih tum kha 240 chauh neiin, midang mamawh lo thei loin Pathianin a siam tih a sawi a ni.
Hneh takin sawrkar pawh nise, India danpui Article 371G chu nghing tura ngaih a nih laiin, midangten dan an neih dan leh keini neih dan chu a inang loa, state dangin special provision an neih chu khawngaihnaa pek a ni a. Keini neih erawh engti kawng maha tih danglam theih loh a ni tih tih Zoramthanga hian a sawi.
“ He remna nei tur hian MNF-in tih hmasak tur tam tak kan nei a, khatih laia kan dan hman mek pawh India dan kalh loa siamrem a ngai a, kan ralthuam zawng zawng surrender loin, kan hand over a ni. Kan tih tur kan tih hnuah anni’n Article 371G min hlan a. He dan hi min chhuh dawn chuan a man kan pek tawh kha min pek let a ngai dawn. An kuta kan hlan hi India hian min pek let tur a nei tam em em a, chumi min pek let erawh thil tih chi a ni lo ang,” a ti.
Kan remna ngheh leh lawmawm zia hre chung a, a man kan pek tawh min pelet leh dawn a nih chuan court-a kan zualko nghal a ngai dawn a, Supreme Court emaw International Court of Justice-in ngaihtuah se, thiam min chantir ngei dawn niin MNF hruaitu hian a sawi bawk. “Chutiang thil chu central sawrkar hi eng dinhmunah pawh ding se, an rawn tih a rem lo a ni. Heng hi hriain kan remna thatna leh nghehna hi kan hriatchian lehzual a tul a ni,” a ti.
Inremna neih lai khan, thlan lal ni lo, Pu Laldenga sawrkar hnuaiah ralthuam an tung a, an dote thuhneihna hnuaia an chakna thahrui hlan kha rem an ti loa, ram mipui aiawha zalenna sualtute himna tur ngaihtuah lawk rana he remna hi neih a ni tih a sawi.
Remna Ni lawmnaah hian hnam pasaltha martar-te hriatrengna leh sunna hun hman a ni.