Kangmei lak atangin nutling chhanchhuak

Kangmei lak atangin nutling chhanchhuak
‘Mizo nula leh tlangvalin ka tih ang khan an ti vek ang’
In a kang a, a chhungah nu pakhat, kum 70 vel mi a awm. Tlangval pakhatin a hruaichhuak a, him damin an inchhan thei hlauh. Chu tlangval chuan a thiltih chu a huaisen bik vangah a ngai lo a, “Mizo nula leh tlangvalin ka tih ang khan an ti vek ang,” a ti.
April ni 15, Inrinni tlai lamah Tlungvel Vengthar-ah in a kang a, Venghlun lama Malsawmdawngzela te hnathawk bangin haw tura an insiam laiin kangmei a chhuak tih an lo hria a, hmanhmawh takin an pan ve nghal.
An thleng a, a lo thleng hmasate leh thleng tharte nen in kang chu thelh an tum a, tui te khaiin theihtawp an chhuahho ta a ni. Mahse vanduaithlak takin in kang chuan an kawmthlang te in a man ta tlat mai.
An sawi danin, thil a puak dur a, meialhin kawngpui a thleng nghal a, kawmthlangte in a kang kai ta a ni.
Meialhina a man thar chu Pi Nuntluangi te in a ni a, Dawngzela chu hmanhmawh takin a tlan lut ta nghal a; a chapal a chhiat tawh deuh bakah a nal avangin a phelh a, ke lawngin Pi Nuntluangi te inah chuan a tlan lut. A luh dawnah a kawrlum a phelh leh bawk.
Chu in chu chhawng thuma sang a ni a, in chhungah step a awm. Step atang chuan a chung bera Pi Nuntluangi lo awm chu Dawngzela chuan a hmu thei nghal a, hmanhmawh takin a pan chho nghal. Nutling, kum 70 vel mi, tuan fum tawh lam chu step-ah chuan a kai thla a, a hmanhmawhthlak viau na a, an hmanhmawh hlei thei lo.
In chu a kang nasa telh telh a, a tlan luhna kawngkaah chuan chhuah tum chi rual a ni tawh lo tih hriain Dawngzela chuan thlang lam bathlar a panpui a, bathlar atang chuan thenawmte in relah a hlang phei ta a ni. Pi Nuntluangi a him ta.
“Ka huaisen bik vang pawh a ni lo, tu pawh ni se, Mizo nula leh tlangval tawh phawt chuan ka tih ang khan an ti ang, a hmei a pain khatiang khan an ti ang,” Dawngzela chuan a ti.
Pi Nuntluangi nena inhruai chhuah tuma an beih lai hian hlauh a hre hman lo ni berin a hria a, “Kei aia hlau an awm vang nge ni, hlauh em emna ka nei vak lo,” a ti. “Kei aia chak lo leh tanpui ngai zawk an awm a, chumi ti tur chuan ka indap chawp char char a, hlauh kha ka hre hman lo a nih ka ring,” a ti a, a thiam ang tawkin Pi Nuntluangi a hnemin a fuih a, hlau lo turin a thlamuan char char tih a sawi.
A hun lai aiin a hnua a ngaihtuahin an dinhmun kha hlauhawm a ti zawk a, “|hiante’n an han sawi a, lo tlan lut lo ta ila Pi Nuntluangi dinhmun tur te an sawi a, meialh kha kha ai khan lo nasa zawk ta se tih te an sawi a, han ngaihtuah let leh hian a hun lai aiin hlauhawm ka tiin ka hria,” a ti.
A hnathawk bang, haw tura a insiam laiin in a kang tih a hria, a thiante nena an pan nghal chu Mizo tlangval tih dan ve reng a ti a, Pi Nuntluangi a hruaichhuah dan oawh Mizo tlangval tih dan ve reng a ti.
“Chutianga han fakna tur ka awm lo, mi tih dan ve tho a ni a, Mizo nula leh tlangval zawng zawng tih dan tur kha ka lo ti ve a ni mai. Ka huaisen bik vang a ni lo,” Dawngzela chuan a ti.