Kar tawp kan nghahhlelh nachhan pakhat chu inkhel hmuhnawm tak tak a awm thin vang a ni. EPL-ah Arsenal chak laiin Manchetser City an chak zo lo va, United an tlawm. French Ligue 1 lamah Kylian Mbappe a chetha chhunzawm a, season thara European top 5 league-ah goal thun hnem ber a ni mek. Kar tawp football hnuhma langsar tarlang leh ang aw!
English Premier League
Inrinni zanah 2-1 a Wolves an hneh tumin Bukayo Saka chuan hmahruaina goal a thun. Saka goal thun hi kum 2023 chhunga Arsenal goal 100 na a ni. Europe a club lian panga ten kum 2023 chhungin goal 100 chuang an thun thei a, chungte chu Arsenal bakah Manchester City (137), Real Madrid (119), Bayern Munich (111) leh Bayer Leverkusen (110) te an ni.
-- Advertisement --
Pathianni zanah champion lai Manchester City nen 3-3 a an inhnehtawk tumin Tottenham player Dejan Kulusevski chuan hun tawp dawn hnaihah tlawm an pumpelhna goal a thun. Kulusevski hian EPL-ah season thum chhung a zawnin champion lai lakah goal a thun a. Hetiang ti thei pahnihna niin 2000-01 – 2003-04 chhunga Danny Murphy tih theih ang a ti ve tei ta chiah.
Manchester City nen 3-3 a an inhnehhtawk tum hian Tottenham captain Son Heung-min chuan goal a thun a, assist a neih bakah own-goal a nei bawk a, EPL-ah hetiang ti thei pangna niin Kevin Davies, Wayne Rooney, Gareth Bale leh Jacob Ramsey te hnung a zui.
Spanish LaLiga
Inrinni zanah si hnih faia Granada an hneh tumin Real Madrid tan Rodrygo chuan goal a thun, Rodrygo hian Real Madrid tan inelna hrang hrang a hmachhawn hnuhnung pangaah goal a thun vek a, Real Madrid tan inelna hrang hranga goal thun zawn rei pahnih na a ni a. A chunga awm chhun chu khelh sarih chhung goal lo thun zawn tawh Karim Benzema chiah a ni.
Italian Serie A
AC Milan si nghak Mike Maignan chuan Inrinni zanah 3-1 a Frosinone an hneh tumin assist a nei a. Serie A season hnuhnung pathumah assist nei ziah ang a ni a. Kum 2004/05 season hnu lamah Serie A si nghak zinga assist nei ngah ber a ni.
Pathianni zan khan Inter Milan chuan si thum faiin Napoli an hneh. Inter Milan hian season kal mekah Mimuala inkhel an hmachhawnah vawi ruk an chak a, goal hnih chauh an chhuah. European top 5 league club zingah 2023/24 season a Mimuala chak tam ber leh goal chhuah tlem ber an ni.
German Bundesliga
Bundesliga hmahruaitu Bayer Leverkusen chu inelna hrang hrang an hmachhawn hnuhnung vawi 20-ah tlawm an nei lo zawn tawh a. Vawi 18 chakin, draw vawi 2 an nei mek. Hei hi Bundesliga an khelh hnuah tlawm nei lova an kaltluan rei ber tum a ni a. Second division-a an khelh lai 1978-79-ah tlawm nei lovin vawi 23 an lo kaltluang tawh thung.
Stuttgart forwrd Serhou Guirassy chuan an muala Bundesliga an khelhah hnuhnung vawi rukah goal a thun vek a. Mario Gomez hnu lamah Stuttgart tan an muala goal thun zawn rei ber a ni a. Mario Gomez hian kum 2007/08 season khan an mualah khelh sarih chhung goal a thun zawn.
French Ligue 1
Pathianni zanah si hnih faia Le Havre an hneh tumin PSG forward Kylian Mbappe chuan hmahruaina goal a thun. Mbappe hian PSG tan inelna hrang hrang a hmachhawn hnuhnung pali-ah goal a thun bek a. Game li atang hian goal ruk a thun. Mbappe hian season kal mekah goal 15 a thun tling der tawh a, Ligue 1-ah goal thun hnem ber a ni fal a, amah hnaih bertu aiin goal 7 zetin a thun tam zawk mek.
Monaco player Wissam Ben Yedder chuan si hnih faia Montpellier an hneh tumin minute 90’+2-ah an goal hnihna a thun, he a goal hi Monaco tan goal 100 a thun tlinna chiah a ni a. Jean-Pierre Papin (November 1996) hnu lamah Monaco tan hetiang ti leh thei hmasa ber a ni.
Messi-Ronaldo
Inter Miami player langsar Lionel Messi chu inkhel hmachhawn lovin a la chawl hahdam rih. MLS playoff an khelh phak loh vangin Inter Miami hian inelna hmachhawn tur an nei rih lo.
Saudi Pro-League lama thawm nei lian tak Cristiano Ronaldo chuan kar tawp khan goal a thun lo teh mial. Al-Hilal lakah si thum faia an tlawm tumin Ronaldo hian Al-Nassr tan mawi zetin goal a thun zet naa offside vangin a goal thun hi pawmsak a ni lo thung. Inrinni zanah goal thun lo mah se Ronaldo hian season kal kal mekah goal 15 thun tawhin top-scorer a ni mek a. Ronaldo goal thun zat hi kar tawpa goal hnih thun Aleksandar Mitrovic chuan goal hnihin a la tluk lo.