Kar tawp football hnuhma langsar

Kar tawp khan Europe-a tualchhung league lian hrang hrang khelh chhunzawm a ni a, football-ah hnuhma thar hmuh tur a awm. Kar tawpa football hnuhma langsar zual kan hrut kual leh ang.
UCL & Europa League
Champions League leh Europa League quarter-final atangin Premier League club an tla kim a, semi-final lut phak an awm lo. Kum 2014-15 season hnu lamah tun hi EPL club te UCL leh Europa League semi-final lut phak an awm loh vawi khatna a ni.
Europa League quarter-final-ah West Ham lakah Bayer Leverkusen in tlawm an pumpelh a, an muala an chakna hmangin semi-final an lut. German Bundesliga champion thar Leverkusen hi season kal meka inelna hrang hrangah tlawm nei lovin khelh 44 chhung an kaltluang ta chiah a. Europe’s top 5 league a club zingah inelna hrangah hrangah tlawm nei lova kal tluang rei ber record thar an siam a. 2011-12 season a Juventus record an khum.
English Premier League
Pathianni zan khan Brentford chuan an khingpui Luton Town chu 5-1 ngawtin an hneh a, EPL-a an chak chian ber record an lo siam tawh an nihrual. Brentford hian August 13, 2022 khan 4-0 ngawtin Manchester United an lo hneh tawh a, hei hi EPL-a an chak chiang ber record hmasa a ni.
Liverpool in 3-1 a Fulham an hneh tumin Trent Alexander-Arnold chuan mawi zetin free-kick a pet goal. Arnold hian Liverpool tan direct free-kick atangin goal ruk a thun tawh a, Reds tan free kick atanga goal thun hnem pathumna niin, a chungah hian Jamie Redknapp (8) leh Steven Gerrard (7) te an awm.
Table hnuai bera awm mek Sheffield United chuan season kal mekah an mualah ngei goal 50 an chhuah tling tawh a, EPL club zingah season khata an mualah goal 50 chhuah hmasa ber an ni.
Spanish La Liga
Pathianni zan khan Real Madrid chuan Santiago Bernabeu-a an mikhual FC Barcelona chu 3-2 in an hneh. Barca hian season kal mekah Real Madrid laka hma an hruai hnuin an tlawm ve ve a. Hei hi kum 2016 hnu lamah Real Madrid laka result an neih chhiat ber tum a ni.
Barcelona lakah hnufual zawk an nih vawi hnihah Real Madrid in hnehna an chang let ve ve a, Real Madrid chakna goal hi minute 90 hnu lamah Jude Bellingham goal thun ve ve a ni teh tlat bawk. Bellingham hi La Liga chanchinah Barcelona lakah minute 90 hnu lamah goal thun zawn thei hmasa ber a ni.
Iago Aspas chuan La Liga-ah goal 107 a thun tling tawh a, kum 30 chin chung lam zingah La Liga-a goal thun hnem lamah Cristiano Ronaldo a khum a. Goal hnihin Luiz Suarez a la phak lo.
German Bundesliga
Bayern Munich forward Harry Kane chuan Bundesliga-ah goal 33 a thun tling tawh a, English player zingah season khata goal thun hnem ber nih theihna hun tha a nei mek. Kane chungah hian 1963-64 season-ah Tottenham tan goal 35 thun tling Jimmy Greaves lwh 1966-67 season ah Southampton tan goal 37 thun tling Ron Davies te chiah an awm.
Messi-Ronaldo
Nashville an hneh tumin Lionel Messi chuan Inter Miami tan goal hnih a thun a, Messi hian Inter Miami tan khelh ngaah goal hnih a thun tawh. Footballer ropui ber Messi hian Inter Miami tana goal thun hnem ber ni turin goal 10 chiah a mamawh tawh.