Kar tawpa record langsar zual

Inrinni leh Pathianni zan khan European top 5 league khelh chhunzawm a ni a. Tualchhung league lian zual pangaah record leh chanchin ngaihnawm a awm neuh neuh a. Tun tuma hian kar tawp football a thilthleng chhinchhiahtlak zual kan tarlang ang.
Liverpool 7-0 United
English club inhal em em Liverpool leh Manchester United te chu Pathianni zan khan Anfield-ah an inhmachhawn a. Liverpool in an mikhual Manchester United chu 7-0 ngawtin an sawp. 7-0 ngawta an hmelma lian Manchester United an sawp hi Liverpool in United an sawp ber tum a ni. Kum 1897 daih tawh khan English league second division lamah Reds hian 7-1 in Red Devils hi an lo sawp tawh bawk.
English club ropui Manchester United hi kum 90 chhungin an khingpuite lakah 7-0-a an tlawm vawi lina a ni a. Liverpool lakah 7-0 ngawta an tlawm hma khan Wolves (December 1931) Aston Villa (December 1930) leh Blackburn (1926) lakah 7-0 hian an lo tlawm tawh bawk.
Pathianni zanah goal sarih ngawt a chhuah khan Manchester United si nghak zingah clean sheet ngah ber David de Gea-a’n inkhel a hmachhawn tawh zawng zawng game 578-ah game khata goal 7 chin a chhuah vawi khatna a ni.
Fowler khumtu Salah
Manchester United laka goal hnih thuntu Mohamed Salah khan Robbie Fowler record a khum a, EPL-ah Liverpool tan goal thun hnem ber thar niin, EPL-ah Reds tan vawi 205 khelin, goal 129 a thun tling ta chiah. Salah khan kawr a phelh vangin yellow a hmuh vawi hnihna a ni a. Kum 2017-18 hnu lamah kawr phelh vanga yellow card hmu ngun ber a ni tel bawk. Aigupta tlangval Salah hian Manchester United an hmachhawn hnuhnung parukah goal a thun vek a. Liverpool player awm tawh zawng zawng zingah United lakah game ruk chhunga goal thun zawn vek thei awmchhun a ni.
Foden – 50
Inrinni zanah Manchester City tana goal khat thun Phil Foden khan Premier League-ah City tan goal 33 thunin, assist vawi 17 a nei tling tawh bawk. Kum 22 leh ni 280 a upa Foden hi City tan EPL-ah goal 50-a inrawlh tling naupang ber a ni.
Goal thun rang pahnihna
Arsenal an hmachhawn tumin AFC Bour-nemouth player Phillip Billing chuan inkhel tan atanga second 9.11 chhung lekin goal a thun nghal a, hei hi EPL-a goal thun rang ber pahnihna a ni a. EPL-a goal thun rang ber chu April 2019-ah Watford an hmachhawn tuma Southampton player Shane Long-a’n second 7.69 chhung leka goal a thun kha a ni thung.
Barcelona
La Liga hmahruai mektu FC Barcelona hi season kal mekah 1-0 in vawi riat an chak tawh a. Hei hi La Liga an khelh tawh zawng zawng season khatah 1-0-a an chak ngun ber tum niin, club record thar an siam.
Thomas Muller
Bayern Munich forward Thomas Mueller chuan inrinni zana VfB Stuttgart an hmachhawn tum khan assist a nei a, Bundesliga-ah goal 300-ah a inrawlh tling chiah. Bundesliga-ah goal a inrawlh (goal score & assist) hnem ber goal 367 zeta inrawlh Robert Lewandowski a ni a, Thomas Muller hi pahnihna a ni.
PSG tana goal thun hnem ber Mbappe
Inrinni zanah 4-2 a Nates an hneh tum khan Kylian Mbappe chuan hun tawp dawn tepah PSG goal lina a thun a. Mbappe hian Edinson Cavani record a khum a, PSG tan inelna hrang hranga goal thun hnem ber record thar a siam. Kum 24 mi Mbappe hian PSG tan inelna hrang hrangah vawi 247 khelin goal 201 a thun tling tawh.
Footballer ropui bera ngaih Lionel Messi hi kum 24 mi a nih laiin a khelhna FC Barcelona tana goal thun hnem ber a lo ni tawh a. PSG record thar siamtu Mbappe pawh hian kum 24 mi a nih laiin a khelh mekna PSG tan goal thun hnem ber reocord thar a siam ve bawk.
Messi – 1000
Footballer ropui ber Lionel Messi hi club leh ram tan goal 1000 zetah a inhnamhnawih tawh. Fifa best player 2022 chawimawina dawngtu Messi hian inrinni zan khan Nates lakah PSG hmahruaina goal a thun a. Club leh ram tan inelna hrang hrangah vawi 841 zet a inlan tawh a. Goal 701 thun tawhin, vawi 299 zet assists a nei tling tawh bawk.