Kar thum chawl tur Trent Alexander-Arnold

Kar thum chawl tur Trent Alexander-Arnold
Liverpool assistant manager Pep Ljinders chuan media hmachhawnin, an defender khup na Trent Alexander-Arnold chu chawlhkar thum tal a chawlh rih a tul tur thu a sawi.
Kum 25 mi England inter-national hian karliamta Pathianni FA Cup third-round inkhel pakhata sihnih faia Arsenal an hneh tum khan a khup a tina a, chumi chungchang chu sawiin Lijnders chuan scan kaltlanga an defender hliam dinhmun a hriatchian theih thu leh chawlh-kar thum thleng a chawlh a ngaih tur thu a sawi a, an tan hlohna lian a nih thu leh an ngai hman hle dawn tih a tarlang tel.
Lijnders chuan Alexander-Arnold theih loh chhunga an tlarhnung leh khelh danphung a buai mai lohna’n kawng an dap nghal tih a sawi a, a mamawh ang chawlh a lak zawhah a that dan ngai renga a kirleh ngei a beisei thu a sawi bawk.
Liverpool hian Premier League table-ah point thumin hma an hruaifal mek a, nizan result tarlan hman lohah an defender rinrawl Trent Alexander-Arnold tel loin Carabao Cup semi-final first leg-ah Fulham an mikhual.
Premier League lamah chuan January ni 21 khian Bournemouth an hmachhawn dawn a, January ni 24 Carabao Cup semi-final second leg-ah Fulham an luhkhung zui leh ang.
FA Cup fourth round lama an tum tur a la chiang lo a, Norwich elawh Bristol Rovers inkhela chak zawk zawk nen January ni 27-ah intumin, January ni 31 khian league-ah Chelsea an mikhual zui leh dawn a ni.
Khup hliamin a tlakbuak mek Trent Alexander-Arnold
hi nikum nipui lai khan club vice-captain atan ruat a ni a, season kal laiah hian Reds tan inelna hrang hrangah match 25 atangin goal hnih a thun tling tawh.
Right-back lama khel thin ni mah se tun season-ah hian hlawhtling takin midfield-ah a inlan a, hliam avangin chawlh-kar thum zet a chawlh leh rih a ngai dawn ta a ni.
Liverpool forward Moha-med Salah chu tunlai hian interna-tional duty-in Egypt team tan Africa Cup of Nations lamah hun a hmang mek a, midfielder Wataru Endo pawh Japan-ah Asia Cup khel turin a chhuakbo tawh bawk.
Lijnders chuan left-back pahnih Andy Robertson leh Kostas Tsimikas-te chu tunthla tawp hian training an zawm leh thei tawh dawn niin a sawi a, dar hliam avanga talbuai pahnih an mamawhna hi a sang zual sawt a ni.
Liverpool hi hliam avangin an talbuai hle a, midfielder Dominik Szoboszlai pawh kaihza tha na avangin a chawl mek a, captain Virgil van Dijk erawh nizana Fulham hmachhawn tur khan a damlohna atangin a fit tih nimin khan puan a ni.