Karnataka Chief Minister tur Siddaramaiah

Congress te chuan May 18 khan Karnataka Chief Minister turin Siddaramaiah an ruat thu sawiin D.K. Shivakumar chu deputy chief minister a ni ang.
Hruaitu pahnihte hi ‘top post’ inchuhin an inbei nasa hle a, May 20 hian Chief Minister thar tur leh Minister turte chu rinawmna thu tiamtirin lakluh an ni dawn a ni.
Congress president Mallikarjun Kharge chuan ngun taka an ngaihtuah hnuah thutlukna an siam thu sawiin General Secretary (Organisation) K.C. Venugopal chuan hruaitu tinte chuan Karnataka-a hnehna an chan theih nan an thawkrim hle a ni tiin a sawi bawk.
Assembly member 224 thlanna May 10 a neihah Congress te chuan seat 135 lawih an la a, rorel lai Bharatiya Janata Party (BJP) te leh Prime Minister hlui H.D. Deve Gowda kaihhruai Janata Dal (Secular) te chuan seat 66 leh 19 an la ve bawk.
Siddaramaiah leh Shivakumar te chuan State mipuite hamthat nana thawh an tum thu an sawi a. “Kannadigas te that nan lungrual takin kan thawk ang a. Congress party chuan chhungkua angin mipui te tan, langtlang, eirukna awm lo sorkar leh kan thutiam te tihhlawhtlin vek kan intiam a ni” tiin Siddaramaiah chuan a sawi bawk a.
Shivakumar, State Congress president pawhin, “Karnataka hma lam hun humhim leh kan mite hamthatna chu ngaih pawimawh berah kan nei a, kan inlungrual a ni,” tiin a sawi.
Kum 75-a upa ni tawh Siddaramaiah hi Congress legislature Party leader niin a hma pawha Karnataka Chief Minister ni tawh a ni a, a term hnihna a chelh leh dawn ta a. KPCC president D.K. Shivakumar nena an inchuh viau chungin a ding chang ta zawk a ni.
MLA term sarih lai ni tawh leh Karnataka Pradesh Congress Committee president ni bawk D.K. Shivakumar hi State a politician hausa ber pawl a ni a. Vokkaliga family chhuak niin a thawhrimna, grassroot management thiam leh sum ngah hmangin Karnataka politics a palian ni thei reng niin, Karnataka Congress buai thei pawh chingfel vektu anga ngaih a ni.
Kum 1985 khan electoral politics luhchilh tanin khatih laia politics lama palian tun thleng pawha la ni reng Prime Minister hlui H.D. Deve Gowda a khing a, a hneh lo. Mahse, kum 1989-ah thlan tlin a ni a, kum 30 mi lek a nihin minister a ni tawh a, kum 1991-92 atang khan inthlanah chak loh a la nei lo bawk.
Kum 1999 inthlanah khan Shivakumar hian Chief Mnister hlui tho H.D. Kumaraswamy chu Sathanur ah hnehin ‘giant killer’ tia hriat a hlawh phah a.
Congress-in buaina leh harsatna a neiha chingfeltu ni thinin State danga Congress MLA tena harsatna an tawh leh buaina an neihah pawh Shivakumar hi chhanchhuaktu a ni thin.
Siddaramaiah erawh kum 1972-1980 a D Devraj Urs hnua term khat zawh hnua term hnihna chelh leh hmasa ber niin Devraj Urs term hnihna erawh kum hnih chauh a daih thung a ni.
Siddaramaiah hi Chief Minister zinga term khat hmang zo, inthlana chak lo, chumi hnua Chief Minister ni leh thei hmasa ber a ni bawk a.
A term a hmang zo a nih chuan Karnataka Chief Minister zinga term hnih hmang zo hmasa ber a ni bawk ang a. Chief Minister tum li lai ni BS Yediyurappa khan term khat mah a hmang zo lo thung.
Siddaramaiah hi a tirah chuan Janata Dal (Secular) mi leh sa niin kum 2006 khan Congress-ah lutin Congress ten party dang mi an lakluh five-year term hmang zo hmasa ber a ni bawk.
Congress te hian manifesto-ah thutiam liantham panga an nei a – Gruha Jyothi scheme, he mi hnuaiah hian thla tin chhung tinte hnenah free electricity 200 units pek te, Gruha Lakshmi scheme hnuaiah chhungkaw tina hotunu ber hnenah Rs 2000 tanpuina pek te, Uchita Prayana scheme hnuaiah state pumah hmeichhiate tana free a bus chuantir te, Yuva Nidhi scheme hnuaiah graduate hnathawh nei lote thla tin Rs 3,000 pek te leh diploma holder te hnenah Rs 1,500 pek te bakah Anna Bhagya scheme hnuaiah below poverty line chhungkuate hnenah a thlawnin thla tin buhfai 10 kg pek te a ni.