Kartawp atangin Modi-a’n France leh Slovakia tlawh dawn

French President Emmanuel Macron-a sawmna angin Prime Minister Narendra Modi-a chuan tun kar tawp atang hian France a tlawh dawn a, a kar lakah Slovakia a tlawh bawk ang.
Inrinni leh Pathianni hian France-a Nice tlawhin Nilaini leh Ningani inkarah Evian leh Paris a tlawh bawk ang a. Pathianni leh Thawhtanniah Slovakia a tlawh dawn bawk niin external affairs ministry chuan Thawhlehni zan khan thu a chhuah.
France a tlawh thawh khatnaah hian prime minister hian Pathianniah Nice-ah President Macron-a nen an inkawm dawn a, hruaitu pahnihte hian an ram inlaichanna, kumin kum tir lama Special Global Strategic Partnership level-a tihsan tawh, a taka kalpui mek dan an sawi dun ang.
Nice-ah hian hruaitu pahnihte hian ‘Bharat Innovates’ event an hawng dawn bawk a, he event hi India, France leh ram dang atanga thil thar ching chhuaka bul tantu lar leh venture capital fund-te an fuankhawmna tur a ni a. He hmalakna hi India leh France Year of Innovation puala neih a ni a, ram pahnihte thil thar chin chhuahna kawnga an thawhdunna tihchak lehzual tumna a ni.
Nice hnuah hian Slovak Prime Minister Robert Fico-a sawmna angin Modi-a hian a tlawh dawn a. Kum 1993-a an indan hnua Indian prime minister-in Slovakia a tlawh hmasak berna tur a ni a, April, 2025-a President Droupadi Murmu-i’n a tlawh leh Februarym 2026-a Slovakian President Peter Pellegrini-a’n AI Impact Summit-a India a tlawh hnua a tlawhna tur a ni.
A tlawh chhung hian prime minister hian Slovakian Prime Minister Fico nen an inbiain thawhhona kawng thar an dap dawn a. President Pellegrini-a a hmu dawn bawk a. Sorkar thuchhuah chuan Modi-a’n a tlawh hian India-in Slovakia nena inlaichinna tihchak a tumna a nemnghet nawn leh dawn niin a tar lang.
A thawh thum nan Prime Minister Modi-a hian June 16-17 chhunga France-a Evian khawpuia G7 Summit-ah a tel dawn a. Summit chhung hian G7 hruaitute leh sawm bik thawhpui ram leh khawvel huap pawlte nen an inkawm dawn a, summit session-ah te a tel dawn bawk.
Summit karah prime minister hian khawvel ram hruaitu eng emaw zat a kawm bawk ang.
A tawp nan prime minister hian karleh Ningani hian Paris a tlawh dawn a, Europe-a technology leh startup event lian ber, VivaTech Summit-ah pawh a tel dawn bawk a. Prime Minister hian Paris khawpuiah Indian awmte a kawm bawk rin a ni.
Prime minister-in Europe a tlawh tur hian India leh France, Slovakia leh G7-te nena thawhhona an neih mek a tithuk lehzual dawn a. Bharat Innovates leh Vivatech Summit-a a telnaah India chu khawvel huapa innovation, digital transformation leh entrepreneurship-a hmunpui a nih thu a tar lang dawn a; Indian, French leh European technology ecosystem-te thawhhona thar a siam theih beisei a ni.
Sorkar thuchhuah chuan Modi-a’n Europe a tlawh hian a tlawh ramte nena thawhhona tha zawk a awm theihna tur a siam pawh a beiseiawm tih a tar lang.