Kartawp Premier League inkhel thlirkual ang

Kartawp Premier League inkhel thlirkual ang
Chelsea, Tottenham Hotspur leh Arsenal-te’n an tumpui an hneh theuh laiin Manchester City chuan season thar tualchhung league-a an tlawm vawi khatna an nghakchhuak thung!
West Ham United 1-5 Chelsea
London Stadium-a mipui 62,462 zet pungkhawm hmaah mualneitu Hammers hian an mikhual palian an chhaihkawlh hmasa a; tan atanga minute rukna lekah Lucas Paqueta chuan mualneitu team hmahruaina goal khungin, he mi hnu lam hi chu Blues chan a ni chho ta a, five-star Chelsea kan hmuh zingah Joao Pedro a langsar zual.
Brazilian forward hian minute 15 an khelh tlin rualin Chelsea siphurh a sut a, hei hi west London club tana a league goal hmasaber a ni zui ta nghe nghe.
Minute 23-ah Pedro dang Portuguese winger Pedro Neto a lo lang ve leh a; ani hian sikhat faia mikhual team hmahruailetna goal thawhin, darkar chanve khelh pelh hnu deuh lawkah Enzo Fernandez chuan Blues goal thumna thunin, half time-ah Chelsea hian 3-1-in hma an hruai phawt.
London Stadium inkhel tan hma warm-up laiin Chelsea player Cole Palmer a inhliam a, England forward inhliam aiah hian rawlthar Estevao Willian luhtir a ni.
|an hnu lawkah mikhual lam buaina belhchhah turin si an chhuah zui a, mahse, chawlhlawk hmaa an siphurh goal thuma an chhanlet bakah second half chhungin goal hnih dang an khungbelh leh ta cheu a, he goal hnih hi Moises Caicedo leh Trevoh Chalobah-te thun niin, season kal laia a vawi khatna atan Blues an chak ve ta. An bultanna inkhel kha draw-in a tawp.
London derby inkhuangrual lo zetah hian West Ham goalkeeper Mads Hermansen chu a home debut-ah a hmai a uang lo kher mai a, goal nga zet chhuahin, an bultanna inkhelah mualneitu team kha kai thar Sunderland muala sithum fai ngawta lo tlawm tawh an nih bawk avangin derby-a an han tlawm nawn leh sak khan Hammers fans a tithinur ngang mai!
West Ham United hi an home match khelh hnuhnung vawi rukah an chak zo lo fai vek a; khelh hniha point la hmu loin table-ah a mawngphah an luah nghet charh!
English Premier League bultanna match hmasa pahniha point li hum chungin table-ah Chelsea khan pathumna an thut ve thung.
Manchester City 0-2
Tottenham Hotspur
Etihad Stadium-ah leh nghal sihnih fai tlawnga tlawm hi City-te ang team tan chuan a mawi fahran lo ngawt mai!
League season bultannaa manager thar Thomas Frank hoa chak tawh Spurs an phur laklawh a, Inrinni zanah pawh chawlhlawk hma minute 10 la awmah Richarlison-a ball chhawp sak atangin Brennan Johnson chuan an goal khatna an hlawhchhuak a; second half tan phat, tuibur hmaum da pawh tling loah Joao Palhinha chuan City goalkeeper James Trafford-a tihngaihna hriat loh goal hmangin sihnih faia London mikhual team chakna goal a khung zui leh.
Tottenham Hotspur hi nikum November thla pawh khan Etihad Stadium-ah hian si li fai tehrengin an lo chak tawh a, Inrinni zanah City hliam chu chingalin an han leih leh sak a, English football-ah Manchester City rorel thinna kha a tlusawp chiang ta a tih ngam tawh mai em? Khaw’ng Erling Haaland meuh pawh kha a awm tak tih mai a awl!
City boss Pep Guardiola hian Tottenham hi a ngam lo laklawh ve bawk reng reng a, inelna hrang hranga Spurs a hmachhawn hnuhnung vawi 15-ah Spanish coach ropui hian tum riat ngawt a team a tlawmpui tling ta!
Mualneitu team buaina belhchhah turin Inrinni zan inkhel minute 22-na lekah an defender lei thar Rayan Ait-Nouri a inhliam.
Inkhelh banah Guardiola chuan a eng lam hawiin a la thlir ta rih tho a, “Kan hnathawh dan kalhmang ka hria a, player-te thiltih pawh ka hre bawk a; tlawm mah ila a tha lam hmuh tur tam tak a awm a, insiamthatna lai tur pawh kan nei bawk a; step by step-in kawng dik kan zawh ang a, inpawhna tha zawk kan chherchhuak ang,” a ti.
Manchester City hian season thar league khelh hniha point thum neiin table-ah pangana an luah.
Arsenal 5-0 Leeds United
Emirates Stadium-ah inkhelh tan hmain Gunners chuan an mite hmaah pound maktaduai 60 ngawt senga an lakluh thar Eberechi Eze an phochhuak a; an kawtkaiah hnehna nuamsa chang zuiin, khelh hniha point ruk nen Premier League standing-ah hma an hruai.
Hneh viau e ti loin Arsenal goal hmahruai hi minute 34-na daiha Jurrien Timber-a tih goal a ni a, a trademark set piece hmang ngei maia a hlawhchhuah ni lehin, first half chawlhlawk hma hun pekbelha Bukayo Saka goal tur a chhawpsak leh bawk.
Second half tir lam minute 48-ah Viktor Gyokeres chuan north London club goal thumna thawh ve lehin, hei hi a club vawn lai tana a Premier League goal hmasaber a ni zui ta nghe nghe.
A hnu rei vak loah goal hmahruai thawhtu Timber bawkin a goal hnihna a tilut a; hun pekbelh tawp dawnah penalty atangin Gyokeres pawhin a goal hnihna leh si nga faia mualneitu team chakna goal ni nghal a chhuihlut ve leh.
Emirates Stadium chhunga mipui 60,110 zet so bulh bulh karah khan Mikel Arteta chuan English attacking midfielder kum 15 mi lek Max Dowman chu a Premier League debut nghahchhuahtir a, Gunners tana starting eleven chang thar Noni Madueke a thlak.
Dowman hian sulhnu tha a hnutchhiah nghal a, Anton Stach laka a penalty hlawhchhuah hmangin Gyokeres chuan Arsenal goal ngana a chhuihlut a, hun a tawp zui nghal.
Kum 15 leh ni 234 chiaha upa ni chunga khelmual lut debutant Dowman kha Arsenal tana khel thei naupang ber dawttu niin, September 2022-a kum 15 leh ni 181 ni chunga Brentford laka bul tan a team-mate Ethan Nwaneri kha record kawltu chu a la ni.
Bukayo Saka leh a captain Martin Odegaard-te thlak ngai khawpa inhliam kha Spanish coach Arteta tan kha inkhela lawm lohna awmchhun a nih hmel.
Norwegian midfielder Odegaard khan Gunners tan mellung phunin a game 200-na a khel a, first half-ah thlak ngai khawpin a intina a, a hliam dinhmun dik tak kha hriat theih a la ni chiah lo.
Inrinni inkhel dangah AFC Bournemouth chuan sikhat faiin an mikhual Wolverhampton Wanderers an hneh a; chuti zat bawk chuan Aston Villa pawh Brentford mualah an tlawm a; sihnih faiin Burnley lakah mikhual Sunderland an chak lo ve bawk.
Nizan result tarlan hman lohah Fulham-in Manchester United an mikhual a; Crystal Palace khelmualah Nottingham Forest an lut bawk.
Liverpool veng pakhat Vauxhall-a Bramley-Moore Dock hmuna an stadium sak tharah a vawi khatna atan Everton pawhin nizan vek khan competitive game an khel a, Bramley-Moore Dock stadium-a an mikhual Brighton and Hove Albion an hneh leh hneh loh tarlan hman a ni lo.
Zanin hian champion lai Liverpool chuan Newcastle United an luhkhung ve thung ang.