Kartawpah ruah kaihhnawih chhiatnaah mi 25 vel thi

Kartawp chhung khan India hmar lam leh hmarchhak biala ruah sur nasa vanga tui lian leh lei min vangin mi 25 vel an thi niin thuneituten Thawhtanni khan an sawi a, ni eng emaw zat ruah a la sur belh dawn niin an sawi.
India awpna hnuaia awm chin Kashmir-a Poonch, Rajouri leh Doda district-a ruah sur kaihhnawih chhiatna hrang hrang thlengah mi 15 an thi a, mi dang eng emaw zat chin hriat lohin an awm bawk tih police hotu lianin a sawi.
Hmarchhaka Nagaland-ah chuan ruah sur chhunzawm zel avanga lei min tam tak a awm avangin mi pakua an thi a, chhanchhuah hna thawktute chuan ruang pali an hmu tawh niin district thuneituin Reuters a hrilh.
An thenawm, Assam-ah pawh Pathianni khan tui lianin mi pakhat a thi tih state disaster management thuneituten a sawi a. State chhunga district pasarihah mi 57,000 chuangin ruah sur nasa avanga harsatna an tawk mek niin an sawi bawk.
India weather office chuan X-ah, “Ni 6–7 chhungin hmrthlang, khawchhak leh hmarchhakah fur ruah a la sur chhunzawm dawn a ni,” tiin Thawhtanni khan an tar lang.
India-ah hian June atanga September thla inkar hi fur hun lai a ni a, hetih hun lai hian ruah a sur nasat thin avangin hmun tam takah lei min, tui lian, tek tla leh chhiatna dang vanga thihna a tam thin hle a. Hetih rual hian lo neitute tan a tangkai a ni a, ruah sur that leh that loh hi ram eibar dinhmun hriltu pawimawh tak a ni tel.
An thenawma Himalayan tlangdunga awm, Nepal-ah pawh June thla laihawl atanga ruah a sur tan atang khan tui lian, lei min, ruah sur nasa leh thli tleh vangin mi 27 an thi tawh a, pakhat chin hriat lohva awmin mi 69-in an hliam tawh bawk niin niin National Disaster Risk Reduction & Management Authority chuan a sawi.
An khawpui, Kathmandu leh chhim lam phaizawl inpawhna kawngpui telin kawngpui liam tam tak chu lei minin a tipung a, tam tak khar a ni tih police-ten Thawhtanni khan an sawi.
Nepal-a weather department chuan Thawhtanni vek khan Himalayan tlangdunga ram hmun tam takah ruah a la tla deuh dawn niin an sawi.