Kate Bush ‘Running Up That Hill’-in 1B stream a hlawh

Kate Bush hla hlui ‘Running Up That Hill (A Deal With God)’ chuan Spotify-ah vawi tluklehdingawn stream a hlawh ta a, he hla hi Netflix drama ‘Stranger Things’ season li-naah an hmang a, a hla hi 1985-a a tihchhuah daih tawh ni mahse, tunah a rawn lar thar leh ta a ni. A hla hi Kate Bush studio album pangana ‘Hounds of Love’ atanga single niin, a vanglaiin Billboard Hot 100 chart-ah No.30 a kai a, mahse, kuminah chart No.1 te a rawn kai thar leh ta a ni.
‘Running Up That Hill (A Deal With God)’ 1980s hmeichhe solo artist hlaah chuan Spotify-a vawi tluklehdingawn stream kai thei hmasa ber a ni ta a ni. 1980s-ah chuan Spotify kan la hre lo va, streaming pawh kan la hmelhriat lo, hei vang hian heng hunlaia hlate hi a vanglaiin lar viau mah se tun hnuah streaming lamah an sang vak thei tawh thin lo a, 1980s hla Spotify-a vawi tluklehdingawn stream hlawh thei pawh hi a tam lo reng a, Tears For Fears ‘Everybody Wants to Rule The World’, Toto ‘Africa’, A-ha ‘Take on Me’ leh The Police ‘Every Breath You Take’ te chiah hi 1980s hlaah chuan Spotify-a vawi tluklehdingawn stream hlawh thei an la ni.