Freestyle footballer-in record siam

Hmeichhe freestyle footballer Liv Cooke chuan second 30 chhungin sit-down alternating football crossover vawi 76 a tihman a, hmeichhe zinga second 30 chhunga hetiang tihnem thei ber record a siam. A record hi Royal Caribbean Symphony of the Seas cruise ship-ah ngei, Barcelona-ah ngei a siam a ni.
‘Sit-down alternating football crossover’ chu chhuatah an thu a, an ke pakhatin ball an sêp a, ball sep lohna lam ke chuan ball kân laiin ball helin a lo ti vir kual pap pap zel bawka, chetran ngai tak a ni ngei ang.
Liv Cooke, kum 24, chuan, “Ka tan chuan world record siam ringawt hi a ni lo a, eng emaw hmachhawp neih a, tihpuitlin tuma beih hi nuam ka ti a. Hmeichhe lama world record chauh ni lovin, a pumpuia world record siam ka duh, a chhan chu khawvela freestyle footballer tha ber nia ka inhriat vang a ni,” a ti.
Liv Cooke chuan u mipa pahnih a neihte chu a football zinkawngah an pawimawh tih sawiin, “Ka kal chhet chhet theih atangin ball min pet tir an tum a ni nghal deuh mai a, inzir nan min hmang nasa thin. Keipawhin football ka ngaina a, khawlaiah ball ka um kual deuh reng mai a ni,” a ti.
Liv Cooke hian England tana khelh a chak a, chutiang kawng pawh chu a zawh thui hman viau a, mahse, a hnungzang a tihliam palh hlauh mai a, thla sarih chhung zet a chawlh a tul phah a, chuta a rawn dam leh chuan freestyle football lam a tuipui ta a ni.