Kawng a zia, tuialhthei a zia
Tun hnaiah Mizoramah tuialthei a tam tawk lo a, mahse he harsatna hi a zia telh telh. Filling station lamah intlar a la ngai fo tho na a, petrol leh diesel hi an ngah telh telh.
‘Khua a tha a, khua a that chuan tanker an tlan tluang thei deuh a, tunah chuan mipui tan manganna tur a awm lovah kan ngai,’ tiin filling station (petrol pump) enkawltute chuan an sawi.
September thla atang tawh khan kawng chhia vangin Mizoramin harsatna a tawk a, Mizoram chhung hmun hrang hranga kawng chhia chu thuhran ni se, chakkhai lakluhna kawng pawimawh Vairengte leh Aizawl inkar kawngpui a chhiat avangin tuialhthei leh ni tin mamawh thil lakluh kawngah Mizoramah harsatna a tawk nasa hle. Kawng hi a theih ang anga siam a nih bakah khua a chhiat loh chuan a nal lo deuh a, bungraw lakluh pawh a hma anga hautak a ni ta rih lo.
Tuialhthei phurtu tanker-te chuan Vairengte atangin Aizawl hi vanneih chuan ni khatah an ban thei tawh tih an sawi. Hei hi tuialhthei lama harsatna a zia telh telh chhan a nih thu an sawi.
Kawng chhiaah hian tanker-te leh lirthei dangte an tang nasa thin a, ni thum leh zan thum an thang chang te pawh a awm. Tunah chuan khua a tha a, chutiang em em a ngai ta lo.
Tanker-te sawi danin, kawng hi a la tha lo na a, a hma ang em ema chhia kha chu a ni tawh rih lo. Ruah a sur loh bawk avangin rei deuh deuh an thang tawh lo. Mahse kawng hi tha pangngai a la ni lo a, lung vawm khawmah an tlan. Chuvangin an la tlan chak thei chuang lo a, vanneih chuan ni khata ban hman chang an nei tawh.
Filling station enkawltute pawhin tuialhthei a thlen that telh telh thu an sawi a, mahse kawng chhiat vanglaia harsatna avang khan ngaiawh khawp chu an la ni lo tih an sawi.
Tuialhthei hi Mizoram atangin Silchar vel leh Guwahati-a mi an la a, Vairengte atanga Aizawl phurh thlenah tun hnaiah harsatna an tawk a ni.
Tanker-te leh bungraw phur lirthei dangte’n lirthei a uiawm thu an sawi a, kawng chhiaah an insawh nasa a, a chang phei chuan an tlu a, lirthei enkawl nan sum an seng nasa tih an sawi. Lirthei a chhiat phah bakah diesel a heh avangin a hautak sawt tih an sawi bawk.