Kawng chhiaah union minister tang

Kawng chhiaah union minister tang
Nilaini khan Dampa biala campaign-a kal union minister George Kurian chu kawng chhiaah darkar khat dawn a tang a, amah vengtute’n motor hi an nawr laih laih.
Thu dawn danin, George Kurian-a hi hetia a tan bakah hian campaign-a a kal kualnaah a insawh nasa a, a chauh deuh avangin Ningani tuka a tih tur pawh a ti ta lo.
Minister of State for Fisheries, Animal Husbandry and Dairying and Minority Affairs Kurian-a hi Nilaini khan Lengpui Airport-ah a tum a, heta tang hian Dampa bial by-election lo awm tura Reiek tlang dunga campaign turin a kal nghal. Darlungah a kal a, chuta tanga khaw danga campaign tura a kal chu, Darlung pelh, Kanghmun nena an inkarah a tang ta a ni.
A zinpuite chuan minute 40 chuang an tan thu an sawi a, innova car-a a chuan thu, an tan rei tak deuh avangin a motor a thlak thu, an chhuah hnuah innova-ah a chuan leh thu te an sawi a, hmun dangah pawh a insawh nasat avangin Aizawla a thlenna hotel a thlen chuan a chauh thu te, a tuk zingah a mi hmuh turte pawh a hmuh tak loh thu te an sawi.