Kawng chhiat vangin tuialhthei thleng tha lo

Kawng chhiain Mizoram a nghawng mek a, tuialhthei pawh a thleng mumal lo mek. Mahse tuialhthei chungchang hi manganna tur khawp chu a ni lo tih thu dawn a ni. Food, Civil Supplies & Consumer Affairs department hotute chuan tun hnaiah petrol leh diesel a thleng tha lo tih an sawi a, mahse harsatna lian tham chu hei hian a thlen rih lovah an ngai a, manganna tur khawp chu a ni lo tiin The Aizawl Post an hrilh.
Petrol leh diesel hi kar hmasa lam atang khan a thleng tha lo a, a thleng tlem hret hret tih an sawi a, mahse a thlen that leh thuai an beisei thu an sawi.
Mizoram chhung hmun hrang hrangah kawng a chhia a, Mizoramin ni tin mamawh thil a lakluhna kawng pawimawh Silchar leh Aizawl inkar kawng a chhiat avangin, hei hian ni tin mamawh thil lakluh kawngah nghawng a nei mek. Food, Civil Supplies & Consumer Affairs department hotute chuan tuialhthei pawh hi Aizawl leh Silchar inkar kawng a chhiat avangin tun hnaiah a thleng tlem an ti.
Tuialhthei phur motor hi Vairengte chu an thleng a, Vairengte an pel lovin an ding tih an sawi a, Khamrang leh Sairang inkar vel a chhiat avangin Vairengte hi an pel hlei thei lo tih an sawi bawk.
Kawng chhia hi PWD-in an siam a, chuvangin lirthei hi an tang rei lo turah an ngaih thu leh, bungraw phur lirtheite an tlan pangngai leh theih thuai an beisei thu an sawi.
Tunah rih chuan tuialhthei hi control tumna a awm lo a, khuahkhirhin awmzia a neih a rinawm loh thu an sawi.