Kawng siam chhiat vangin Lokayukta pun

Lunglei district Luangmual to Vaisam kawng siam meka hna thawh tha lo nia sawi a nih avangin he thila mawhphurtute chhuia hremna pe turin Lokayukta Mizoram pun an ni. Social activist Vanramchhuangi @ Ruatfela Nu sawi danin, sawrkar laipui scheme Pradhan Mantri Gram Sadak Yojana (PMGSY) hnuaia Lunglei district-a Luangmual leh Vaisam inkar kawng laih leh black topping hna thawhnaah, video darh atangin kawngsir tui luankawr (side drain) chhia a hmu a, a hmain he kawng laih mek chhe lutuk chungchang hi an lo sawi fo tawh bawk avangin RTI dan hmanga an document dilchhuah nen Anti Corruption Bureau (ACB) ah FIR a thehlut a, ACB hian hma an lakna thawm a hre zui lo tih a sawi.
Hetihlai hian kumin February 20 khan he kawng siam mekah bawk hian video darh, black topping chhia nia sawi a awm leh avangin, February 25 khan Lokayukta-ah complaint a thehlut ta tih a sawi.
“He kawng laih hna thawktu (contractor) VRS Construction Zonuam Aizawl leh a viltu, Mizoram Public Work Department (MPWD) Lunglei Road Division-a a lu ber, engineer-te hian mipui sum (public fund) a mipui tam takin an chhawr tangkai tur, inkalpawhna kawng laih hna leh vil hna an thawhna kawngah sum neitu, mipui zahpahna chhete mah neiloin, duhdah takin kawng an siam a, he kawng laih hna thawktu leh a viltu hian, inang rengin ram mipui pawi an sawi a, ram dan dinglai pawh an bawhchhia a ni. Hetiang state meuh zah loa vantlang kawng laitute hi dan anga hrem an nih ngei theihnan Lokayukta-ah hian mipui aiawhin ka thlen a ni,” Vamramchhuangi hian a ti.
He kawng siam chungchangah hian Thawhtanni khan Lunglei South bialtu MLA Lalramliana leh Lunglei West bialtu MLA T Lalhlimpuia te kaihhruaiin Lungleia PWD hotute, hna thawktu VRS Construction, Sub-Hqrs YMA Lunglei hruaitute leh an hnuaia Vigilance & Monitoring Committee an lo thukhawm tawh a. Sub-Hqrs YMA Lunglei huaihawtin PWD hotute, contractor lam, Vaisam leh Chithar khawtlang hruaitute leh YMA hruaitute nen kawng hi a hmunah enfiahin, thil nih dan leh hma lak zui dan tur sawiho nise, an ti.
Luangmual atanga Vaisam inkar PMGSY kawng sial mek hi km.28-a thui a ni a. A hna hi composite work, kawng laih atanga a luan (flexible pavement) thleng thawh tur niin, kawng siamna sum ruahman hi cheng nuai 4518.74 a ni. March 2025-a thawh zawh tura ruahman niin, February 5 thleng khan hna hi zaa 97.13 thawh tawh a ni. Defect liability period hi kum 5 niin, kawng siam hna an thawh zawh vek hnuah pawh kum 5 chhung chu contractor-ten a chhiat thulhah mawh an la phurin, an thawmtha zel dawn a ni.