Kawng siam mek leh KVK tlawh

Kawng siam mek leh KVK tlawh
Tuichang bialtu MLA, deputy chief minister Tawnluia chuan Thawhlehni khan Khawzawl khawchhunga sawrkar hmunhma leh hmalak mekna – Khawzawl Tourist Lodge, National Highway 6-a Khawzawl- Sinzawl- Thanlawn (KST) Junction leh Krishi Vigyan Kendra (KVK) te tlawhin a enfiah.
Khawzawl Tourist Lodge leh NH 6-a KST Junction ah hian deputy chief minister hi NHIDCL leh Khawzawl khawtlang hruaituten lo dawngsawngin, hmalak tawhna leh harsatna tawh an lo sawipui a. An hmalakna chu fakin, an harsatna chinfel dan zawn a nih tur thu a hrilh a ni.
Khawzawl KVK hmuna inkhawm buatsaihah deputy CM chuan, kuthnathawktute tana KVK hmalakna fakawm a tih thu sawiin, kuthnathawktute kawhhmuhtu leh kaihruaitu ni zel turin a chah. Mizoram intodelhna atan tha leh zung thawh huam ringawt a tawk lo, tiin, ram leilung, sik leh sa bakah hralhchhuahna mila thlai chin a pawimawh tih a sawi a. Hemi kawngah hian loneitute chu KVK-a mithiamte nen inrawntlang a, an thurawn la thiam turin a ngen.
A bial chhung Sialhawk leh Tualte-a lakhuihthei leh tomato chingtute hlawhtlinna chu lawmawm a tih thu Tawnluia hian a sawi a. Vawikhatah engkim tih theih ni lo mah se, hlawhtlinna hmuh theiha a awm ta chu a phurawm takzet tih a sawi a ni.
Khawzawl district bawrhsap CC Lalchhuangkima pawhin Khawzawl KVK chu an district hmasawnna lungphum phumtute an ni, tia sawiin, bialtu MLA kuthnathawktute chawikan tumtu an nei chu lawmawm a tih thu a sawi. Sawrkar leh kuthnathawktute thawhhona tha tak zarah Khawzawl district chu ‘Horticulture District of Mizoram’ a chhal ngam a nih thu a sawi bawk.