Kawng siamnaah leiba ngah Thawktute zai ngai turin chah

Kawngpui thawmthat chhoh mekah Mizoram PWD chuan cheng vaibelchhe tel leiba a nei tawh tih PWD minister Vanlalhlana chuan a sawi a. Fur a la zawh loh avangin thawktute zai ngai a, lo dawh hram hram turin mipui a ngen tih a sawi bawk.
PWD minister Vanlalhlana hian thuchah a siam a. Kuminah kum dang zawng aiin India ram pumah fur ruahtui a tla tamin, state tin deuhthawin kan tuar nasa a. Mizoram pawhin tunhnai kum dang zawng aiin kan tuar nasa a, hmun tam takah lei a min avangin kawngpui a hnawh a, kawng thenkhat phei chu a bung/ chhum a. In leh lo chhe vek leh nunna chan an awm chu a pawi takzet tih a sawi.
Khuarel chhiatna a thlen hian PWD chu a tuar nasa ber pawl department a ni ziah tih sawiin, tun tumah pawh an kawng enkawl him aram a awm lo tluk a ni tih a sawi.
‘May 28-a Cyclone Remal-in min chhut atang khan kawngin chhiatna a tawk zawn mawlh mawlh a. Kawng thenkhat chu metre 100 dan lek leka ping tlatte awmin, kawng chhuat bal nasa takte, a thara kawng sial ngaite kan nei a. Heng chhiatna hrang hrang thawmtha (restore) tura PWD-a ka thawhpuite theihtawp an chhuahnaah lawmthu ka sawi a. Zing hma tak atanga che chhuakin zan thim thleng thlengin rim takin an thawk a, Pathianni leh office chawlh pawh sawi thei loin an thawk tang tang han hmuh leh hriat hian min tilawm a. PWD enkawl kawng ni loah pawh sawrkar leh mipui ngenna avangin an thawk hial a ni,’ Vanlalhlana hian a ti.
State sum dinhmun a that lutuk loh avangin sawrkar tan a luhaithlak a. PWD enkawl lai kawng pawh duh anga an cheihnum thei rih lo tih hriatpui turin Zoram mipui a ngen tih a sawi. ;Tunah hian leimin thenna ringawt pawh mi tam tak hnenah a vaibelchhe tel leiba kan nei a. Kan khawl hire-na ten dawhthei taka min lo nghak turin ka ngen a, central leh state sawrkara finance lam enkawltute pawh a bik taka kan harsatna min ngaihtuahsak turin ka ngen nghal a ni,’ a ti.
Mipuiin thawktute zai ngai a, zawldawh taka leimin thiantute tawiawm a, kawng tlang hun dawhthei taka nghak turin a ngen minister hian a sawi a. Leimin then chu zan thim, kawng chung lam atanga lung lo lum thei leh thing tlu thei hmuh chian loh chuan nunna chan palh theih a nih angin, tunhma pawhin leimin then laia chesual nunna chan an lo nei nual tawh tih a sawi.
Hetianga fimkhur ngai a nih avang hian experience ngah tawh zawk officer-ten a theih hram chuan zan thim hnuaia thawk lo turin field lama thawktute an chah a; chutihrualin nunna chan leh hliampui tuar an awm lo nia a hriat thu a sawi bawk.
‘Fur a la zo loa, kan cho reng vang niloin chhiatna hrang hrang thleng leh thei a ni. PWD-a ka thawhpuite fimkhur tak leh Pathian venna dil chungin thahnemngai taka thawk turin ka ngen a; hetianga thawk thei tura hriselna nei turin duhsakna ka hlan a ni. PWD thawktute lo tawiawm a, ei leh in tur buatsaih saktu LC/ VC/ YMA/ MHIP te hnenah lawmthu ka sawi a ni,’ PWD minister hian a ti.