Kawngpui chhiat dan enfiah

Mizoram chak lakna kawngpui, Kolasib district huamchhung hmun tam takah lirthei tana zawh har khawpa chhia chu Mizoram Journalists’ Association Kolasib District chuan Ningani khan a hmunah an enfiah a, NHIDCL contractor pakhat chuan khuar hi hnawhin ‘temporary repair’ hna a tan nghal laiin, PWD hnuaia contractor chuan kar tharah pot hole hnawh hna thawh a tum thung.
Kolasib district-ah National Highway kawngpui hi Vairengte leh Bilkhawthlir inkar bakah Kolasib atanga Kawnpui inkarah a chhe nasa zual nia sawi a ni a. Kawnpui lama kawng chhiat zualna Sethawnah chuan kawngpui chhuat, feet khat leh a chanve aia thuka khuar a tam hle tih sawi a ni bawk. Thudawn danin, ruah a surin kawng a diak bakah kawng a nal a, mihring tan pawh kal harsa khawpa a awm thin vangin darkar thum dawn dawn lirthei a tangkhan chang a awm thin a ni.
Heng kawng hi NHIDCL hnuaia contractor Ratna Infrastructure enkawl ni mah se, tunah Central PWD hnuaia contractor pakhat Sanjit Baruah, Guwahati chuan kawngsir tihfai leh pothole hnawh bakah hna tenau dang a thawk a; Kolasib district NHIDCL hotute chuan hemi atan hian contract agreement engmah an siam loh thu leh an hnathawh azirin sum hi an inpek thin thu an sawi. NHIDCL hian lung an pe a, contractor hian labour ngaihtuahin pothole hnawh hna hi a thawk a ni.
Kolasib MJA-ten an tlawh lai hian Sethawn kawng chhiat zualna hmunah hian labour 18 an awm a, excavator 1 bak khawl dang engmah dah an nei lo tih an sawi. Tuihawk luankawr (side drain) ah leivung tharlam tam tak dah a ni a, hei hi kawngpuia tui a luan chhan leh tuitling siama kawng a chhiat chak chhan nia an hriat thu an sawi.
Hetih lai hian Mizoram PWD kuta la awm Bilkhawthlir Kharzawl thlen hma atanga Kolasib Leitan inkar leh Kawnpui Bazar atanga Khamrang inkar pawh hmun tam takah a khuar a, heng kawng siam tur hian PWD chuan contractor Sadguru ruaiin tunah hian ‘defect liability period’ ah a awm a, department lamin siamthat hna hi ‘direct’ in a khawih thei lo tih sawi a ni. Sadguru hnenah hian siamtha turin an hrilh tawh a, an siam loh chuan an bill pawh hrensak an tum niin PWD hotute chuan MJA-te hi an hrilh.
Kolasib District MJA president Andrew VL Auva chuan fur hun hi kum dangah pawh kawngpui chhiat hunlai a nih avangin, kan mamawh lakluhna kawngpui hi sawrkarin ngaihpawimawhah nei se an duh tih a sawi a ni.