Zo hnahthlakte leh Meitei inkap leh

Chawlhkar thum vel an inkah loh hnuah June ni 29 khan Manipur-a Zo hnahthlakte leh Meitei an inkap leh a, thi leh hliam pawh an awm.
Kangpokpi district-a Leimakhoung khuaah Ningani tuk atang khan hnam pahnihte hi an inkap a, chawhnu lamah pawh an la inkap.
Leimakhoung hi Kuki leh Vaiphei inawmpawlhna khua a ni a, Vaiphei-ah hian Kuki inti leh inti lo an awm. India sipai, 59th Mountain Brigade awmna hnai a ni.
Manipur atanga thu dawn danin, Meitei lamin Leimakhoung khua hi ralthuam kengin an pan a, Leimakhoung khaw thalaite’n chu chu lo hmachhawnin an inkap ta a ni.
“A tir atangin a che hmasaah kan tang ngai lo. Meitei lamin min rawn run a, kan lo in-defend thin. Leimakhoung-ah pawh chutiang tho chu a ni,” tiin Zo hnahthlak hruaitu pakhat chuan The Aizawl Post a hrilh.
Zo hnahthlak lamin an sawi danin, chawhnu lam thlenga an hriat danin Meitei lamah mi pathum emaw pali emawin nunna an chan a, Zo hnahthlak lamah nunna chan an awm em tih an hre rih lo.
Leimakhoung hi khaw lian a ni lo a, mahse khaw dang panga paruk nena inzawm titiha awm an nih avangin, a tul a nih chuan an thenawm khuate hian an pui thei turah ngaih a ni. Chawhnu lamah khan Meitei lam hi an inchah belh niin an hria a, chumi hmachhawn tur chuan Zo hnahthlak lam pawh an inbuatsaih ve nia hriat a ni.
Hemi ni hian Congress president Rahul Gandhi chu Manipur-ah hian a kal a, Churachandpur pawh tlawh a tum. Mahse Imphal leh Churachandpur inkar, kawng chanve velah police-in an lo dan avangin Imphal-ah a let leh a, tlai lamah helicopter-in Churachandpur hi a kal a ni. Zo hnahthlak pawl hrang hrangin an lo hmu tih thu dawn a ni.