Kawngpui dan tumtuten tiamchin awm loin titawp

Kolasib District Land Owners’ Association (KDLOA) in September 25 zing dar 6.30 atanga National Highway 06 leh 306 dan chah an tum chu chhan hrang hrang avangin hemi chawhnu dar 3.30 khan tiamchin awm loin an titawp.
Riverine Reserved Forest notification thiah duhtu, Kolasib district-a four lane sial tumin a paltlang tur ram neitute chuan an thil phut hrang hrang tihhlawhtlin phutin September 25 zingkar atang khan Aizawl – Silchar national highway dan an tum a. Hun engemawchen an dan hnu ah police-in nawrkian tumin an bei a, an innawr nual hman bawk.
Thudawn danin, chief secretary Dr Renu Sharma hoin Nilaini khan thuneitute an thukhawm a. Supreme Court-in RRF chungchanga buaina chingfel tura state sawrkar a hriattirnaa hma lak mek dan a hrilhfiah hnu ah kawng dan hi tiamchin awm loin tihtawp an rel a ni.
Vairengte to Mualkhang inkar kawngpui dunga ram neitu, Kolasib District Land Owners’ Association hian sawrkara thilphut an neihte tihhlawhtlin a nih loh chuan kawngpui an dang ping dawn tih an lo sawi tawh a. An thil phut zingah, ram neitu nihna (ownership of land) hi sawrkarin chingfel rawh se; RRF Notification 1965 hi ram hmasawnna daltu a ni a, thiah ni rawh se; four lane project hi tihhlawhtlin ni rawh se; kum thum chuang hma la thei loa kan ram min khuahkhirh hi sawrkarin sut rawh se, tih te a tel.